Navenda Nûçeyan
Di 23’ê Nîsanê de, polîsên Belçîkayê bi ser studyoyên Stêrk TV û Medya Haber TV de girtin û dest danîn ser kompûteran. Polîs ji bo weşana televîzyonê asteng bikin, di serî de kabloyên elektrîk, rejî û kompûterê, hemû kablo birîn, her der lêgerîn kirin û avahî talan kirin. Li dijî êrişên polîsên Belçîkayê rojnemevan, sazî û destgehên çapemeniyê û gelê kurd bi çalakî û daxuyaniyna cev êriş şermezar kirin û gotin: “Çapemeniya Kurd nayê bêdeng kirin.”
Di 23’ê Nîsana 2024’an de, polîsên Belçîkayê bi ser studyoyên Stêrk TV û Medya Haber TV de girtin û dest danîn ser kompûteran. Polîs ji bo weşana televîzyonê asteng bikin, di serî de kabloyên elektrîk, rejî û kompûterê, hemû kablo birîn. Polîsan her der lêgerîn kirin û avahî talan kirin. Herwiha polîsên Belçîkayê deriyê odeya Uplînk şikandin û ketin hundir û aletên di hundir de jî texrîb kirin. Polîs dema ketin hundir wezîfedarên ewlehiyê kelemçe kirin û dirêjî erdê kirin. Polîsan tundî pêk anîn. Polîs qasî 4 saetan li avahiyê man û piştre bi kel û pelên ku desteser kirine re ji studyoyê çûn. Di dema serdegirtinê de, li bajêr cihê ku studyo lê ne, ji aliyê polîsan ve hate dorpêçkirin. Zêdeyî 200 polîs tevlî serdegirtinê bûn, di nav wan de polîsên rûgirtî û sivîl polîs jî hebûn.
‘Çapemeniya Kurd nayê bêdeng kirin‘
Li Munîhê êrîşên dagirkeriyên yên dewleta Tirk û êrîşên li dijî Çapemeniya Azad hat protestokirin. Çalakî bi pêşengiya Tevgera Ciwanên Şoreşger û Meclîsa Gel a Azad Şevger hat lidarxistin. Di çalakiyê de daxuyanî hat dayîn.
Di daxuyaniyê de hat bibîrxistin ku êrîşa dagirkeriyê ya li dijî Herêmên Parastinê yên Medyayê bi serdana Erdogan a ji bo Başûrê Kurdistan û Iraqê pêk hatiye û hat diyarkirin ku serdegirtin û sansura ku Fransa û Belçîka li dijî çapemeniya Kurd kir, antîdemokratîk e.
Çalakvanan dirûşmeyên “Ji çapemeniya Kurd re azadî, “Bijî Berxwedana Gerîla”, “Jin Jiyan Azadî”, “Hoch die internationale Solidaritat”, “Kujer Tirkiye, Dîktator Erdogan” hatin berzkirin.
Li Viyanayê êrîşa li ser Çapemeniya Azad hat protestokirin
Welatiyan li Viyaniyê jî zextên li ser Çapemeniya Azad protesto kirin û dirûşma “Hûn nikarin heqîqetê bitepisînin” berz kirin. Li paytexta Awûstûrya Viyanayê serdegirtina studyoyên Stêrk TV û Medya Haber TV hat protestokirin. Kurdistanî û dostên wan li ber Parlamentoya Awûstûryayê civiyan û çalakî li dar xistin. Çalakiya ji aliyê DEM-KURD’ê ve hat lidarxistin, bi deqeyek rêzgirtina ji bo bîranîna şehîdên azadiya Kurdistanê destpê kir.
Girseyê pankartên “Belçîka, hûn nikarin heqîqetê bitepisînin” û “Li dijî sansûr û zilmê: piştevaniya çapemeniya Kurd” hilgirtin û dirûşma “Çapemeniya Azad biparêze” berz kirin.
Nûnerên FEY-KOM, Civaka Azad û ATÎK’ê daxuyaniyên ku amade kiribûn xwendin û dirûşmên “Hoch die internationale Solidarität”, “Bijî berxwedana gerîla” û “Bijî Serok Apo” hatin berzkirin.
Êrîşên li ser Çapemeniya Azad li Danîmarkayê jî hatin protestokirin
Li Kophenagê serdegirtina studyoyên Stêrk TV û Medya Haber TV’yê yên li Belçîkayê bi çalakiyekê hat protestokirin.
Li paytexta Danîmarka Kophenagê, serdegirtina studyoyên Stêrk TV û Medya Haber TV’yê yên li Belçîkayê bi çalakiyekê hat protestokirin.
Di çalakiyê de serdana Serokkomarê Tirk Erdogan a li Iraq û Başûrê Kurdistanê û polîtîkayên hevpar ên PDK’ê hatin teşhîrkirin. Di çalakiyê de hate gotin ku ew ê li dijî hemû êrîşên li ber xwe bidin. Çalakî bi dirûşmeyan bi dawî bû.
YJK-E’yê ji bo çapemeniya azad bang kir
Yekîtiya Jinên Kurd a li Elmanyayê (YJK-E) serdegirtina li Belçîkayê ya li hemberî medya Kurd hate kirin şermezar kir û banga mezinkirina piştevaniyê kir.
YJK-E’yê daxuyaniyek da û got, “Li paytexta Belçîka Brukselê bi rengekî korsanwarî serdegirtin li Stêrk û Medya Haberê hate kirin. Welatên Ewropayê ku qaşo demokrat in, bi van kiryarên xwe yên antî demokratîk nîşan didin ku bi ti awayî ders ji komploya navneteweyî wernegirtine.”
Di daxuyaniyê de hate gotin, “Dersa herî mezin a ku gelê Kurd ji van êrişan wergirtiye ew e ku bi yekîtiyê piştevaniyê xurt bikin û van komployan têk bibin.”
Di daxuyaniyê de bang li her kesî hate kirin ku piştgiriya ji bo çapemeniya azad û gelê Kurd mezin bikin.
Di heman çarçoveyê de jî, Yekîtiya Ragehandina Azad(YRA) û Yekîtiya Ragehandina Jin (YRJ)bi daxuyaniyekê êrişên ser Stêrk TV û Medya Heber bi tundî şermzar kiribû.
Di daxuyaniyê de hat diyaririn ku kiryarên Polîsên Belçîkayê û êrişa wan ya ser Stêrk TV û Mediya Heber binpêkirina tevahiya nirxên mirovî û exlaqiye, herwiha binpêkirina mafê mirovan û rojnemevanan e di welatekî ku idîya dike ew pîvanên demokrasiyê pêk tîne û divê hikumeta Belçîkî van kiryaran pêk neyne.
Di dewama daxuyaniyê de wiha hat gotin: “Em wekî rojnemevan, çalakvanên mafê mirovan û destgehên çapemeniyê em piştgiriya xwe bi rojnemevanên Stêrk TV û Medya Heber re radighînin, herwiha êrişên polîsên Belçîkî bi tundî şermezar dikin. Stêrk TV û Medya Heber temsîla dengê rastiyê ne.”
Derbarê heman mijarê Federasyona Rojnamevanên Ewropayê (EFJ) bi daxuyaniyekê êrîşa polîsên federal ên Belçîkayê li ser studyoyên televîzyonên Stêrk TV û Medya Haber, şermezar kir.
Di daxuyaniyê de wiha hat gotin: “Lêgerîna ku bi beşdariya zêdetirî 200 polîsan li avahiyên Stêrk TV û Medya Haber ên bajarê Denderleeuwê hate kirin, ji saet 1’ê şevê heta saet 4.30’ê sibehê dom kir. Weke ku di wêneyan de tê dîtin, gelek derî bi zorê hatine vekirin.”
Li gor daxuyaniya Serdozgeriya Federal, lêgerîn li ser daxwaza dozgeriya dijî terorê ya neteweyî ya Fransayê PNAT hatiye kirin. Di çarçoveya lêpirsîna li ser fînansekirina Partiya Karkerên Kurd (PKK) de, rayedarên Fransî guman dikin ku kanalên televîzyonê bi PKK’ê re têkildar in. Partiya ku di lîsteya terorê ya Yekîtiya Ewropayê da ye, li Belçîkayê êdî wek rêxistina terorê nayê qebûlkirin.”
Daxuyaniya Sekreterê Giştî yê EFJ Ricardo Gutiérrez jî cih girt û got, “Nepenîtiya çavkaniyên rojnamevaniyê ji bo televîzyonên Kurd ên ku li Belçîkayê ne jî bi heman awayî derbas dibe. Divê her binpêkirin bi rêgez be û bi baldarî were meşandin.”
Di daxuyaniyê de her wiha hate bibîrxistin ku ev ne cara yekem e ku televîzyonên Kurdî dibin hedefa êrîşên ewqas mezin ên polîsan û wiha hate gotin: “Berê jî di salên 1996 û 2010’an de du êrîşên bi heman rengî yên polîsan hatibûn kirin.”