BirûcResûl/Qamişlo
Konferansa Ekolojiyê ya Yekemîn bi dirûşma “Bi paradîgmaya ekolojîk Rêber Apo bi awayekî fîzîkî azad bikin û doza Kurd çareser bikin” li zanîngiha Rojava ya bajarê Qamişlo dest pê kir.
Desteya Jîngehê ya Herêma Bakur û Rojhilatê Sûriyeyê konferansa xwe ya yekemîn bi dirûşma “Bi paradîgmaya ekolojîk Rêber Apo bi awayekî fîzîkî azad bikin û doza Kurd çareser bikin” li Zanîngeha Rojava ya Qamişlo dest pê kir. Di konferansêde 120 delege, nûnerên Rêveberiya Xweseriya Demokratîk, partî, rêxistinên civakî û rêxistinên sivîl beşdar bûn.
Konferans bi deqeyek rêzgirtin li ser giyanên şehîdên şoreşê hat destpêkirin. Piştî wê li ser navê hevserokatiya Meclisa Rêveber a Rêveberiya Xweseriya Demokratî Hesen Koçer axivî û wiha got: “Dema ku êriş li ser xwezayê tê kirin, li vir civakê û exlaqên wê dike hedef û wekî ku em dibînin ekosîstem ber bi hilweşînê ve diçe, ji ber vê yekê em her tim li ser bilindbûn û pêşketina hawîrdor û xwezayê disekinin. Dinya ji bo avakirina sîstema xwe ya aborî xwezayê îstîsmar dike û bi vî awayî wêran dike, eger ev yek berdewam bike û zêde bibe cîhan di xetereyê de ye, hemû tevgerên ekolojîk û zanyar ji vê xetereyê hişyar dikin ji ber vê yekê divê bi rêya vê konferansê metirsiyên li ser xwezayê baş bên nîqaşkirin û çareserkirin.”
Piştre sînevîzyonek têkildarî ekolojiyê hat pêşandan, her wiha perspektîfên Rêber Abdullah Ocalan ên der barê ekolojiyê de hat xwendin.
Li gorî komîteya amadekar, konferans wê 2 rojan dewam bike. Di bernameyê de mijarên Ekolojî di modernîteya demokratîk de, Meşandina têkoşîna ekolojîk li kêleka têkoşîna li dijî mêtingerî û kapîtalîzmê, Avakirina çandina ekolojîk ji bo bidawîkirina dagirkeriyê li herêma Bakur û Rojhilatê Sûriyeyê û Hevkariya di navbera rêxistin û tevgerên li herêma Bakur û Rojhilatê Sûriyeyê de, wê were nîqaşkirin.
Posta çûyî