Ayşa Silêman/Qamişlo
YRA û YRJ’yê ji bo şermezarkirina êrîşên polîsên Belcîka li ser Studiyo û navenda Televîzyona Stêrk TV û Medya Heber, li bajrê Qamişlo daxuyaniyek dan.
Îro di demjimêr 12’an de Yekîtiya Raghandina Azad û Yekîtiya Ragihandina Jinê li Navenda Mihemed Şêxo ya bajarê Qamişlo ji bo şermezarkirina êrîşên polîsên Belcîkayê li ser Studiyo û navenda Televîzyona Stêrk TV û Medya Heber, daxuyaniyek dan.
Di destpêka daxuyaniyê de hat diyarkirin ku çapemeniya azad, dengê gel e û di nava pêşbirka ragihandina rastiya gel de ye û wiha hat domandin: “Çapemeniya azad di nava têkoşîneke mezin de ye. Ji bo derxistina rastiya dagirkeriyê û êrîşên li ser nirxên azad ên gel bû xwedî bedelên giranbuh. Di nava vê têkoşînê de bû deng û rengê gelên bindest, li hember tevahl êrîşan. Vê sibehê seat 1 û nîv ji aliyê polîsên Belçîkî ve êrîş li ser navenda Stêrk TV û Medya Haber çêbûn. Herwiha li Stenbol û Enqerayê jî bi dehan rojnamevan hatin girtin. Ev êrîş di vê pêvajoyê de ne tiştekî tesadûfî ne. Roja rojnamegeriya Kurd û di wextekî de ku gefên mezin li ser vîna gelê Kurd tê xwarin de, pêk hatine.”
Herwiha di berdewamiya daxuyaniyê de hat zanîn ku ev êrîş, weke parçeyekî ji êrîşa li ser gelên Kurdistanê ye û wiha hat gotin: “Ev êriş li ser vîna azad a ku li hemberî dagirkeriyê her dengê xwe bilind dike û dixwaze rastiya van êrîşan ji raya giştî re eşkere bike ye. Beriya vê jî êrîş pêk hatin. Lê di vê pêvajoyê de, ev êrîş parçeyek ji êrîşa mezin a li ser tevahî Kurdistanê ye. Parçeyek ji êrîşên qirkirinê yên li ser Kurdan e. Weke Yekîtiya Ragihandina Jin û Yekîtiya Ragihandina Azad, em van êrîşan wek parçeyekî ji êrîşên dagirkeriyê ya li ser xwe dibînin. Em dixwazin ji gelê xwe û raya giştî re bibêjin, ev êrîş nikarin me bêdeng bikin û her em ê bibin rastiya ku gelê me îro pê bawer dike, ji bo wê têdikoşe û berdelên giran dide.”
Di dawiya daxuyaniyê de jî wiha hat got: “Em rojnamevanên jin tevahî hevalên xwe yên rojnamevan vedixwînin ku bi dengê rastiyê û parastina heqîqetê li hemberî van êrîşan bisekinin. Em dibêjin ti kes nikare dengê azad ê gel qut bike û êrîşên di asta qirkirinê de û berxwedaniyên di asta lehengtiyê de li Kurdistanê diqewimin veşêre. Em bang li tevahî gelên xwe dikin ku xwedî li çapemeniya xwe ya azad derkevin. Çapemeniya azad vîna gelê azad e. Biji berxwedana kedkarên heqiqeté. Biji çapemeniya azad.”
