Navenda Nûçeyan
Artêşa Tirk a dagirker bi alîkariya PDK’ê û bêdengiya hikumeta Îraqê, li dijî Qadên Berxwedanê yên li herêma Metînayê ya li Başûrê Kurdistanê êrişên berfireh da destpêkirin. Di dema ku artêşa Tirk a dagirker li dijî Girêlayên Azadiyê bi tevahiya çekên pêşketî yê NATO’yê êrişên dijwar pêk tîne, Erdogan li Bexda û Hewlêrê tê pêşwazîkirin û li ser xwîna gelan û ji bo berfirehkirina dagirkeriyê peymanan imze dike. Li hemberî êriş û planên qirkirinê yên li dijî hebûna gelê kurd, herwiha ji bo piştgiriya berxwedana Gerîlayên Azadiyê tevahiya partiyên siyasî û gelên Bakur û Rojhilatê Sûriyê daketin qadan û helwesta xwe eşkere kirin.
Dewleta Tirk a dagirker di 16’ê Nîsanê de dest bi êrişên berfireh li dijî Qadên Berxwedanê yên herêma Metînayê da destpêkirin. Di van êrişan de tevahiya cûreyên çêk û teknîka pêşketî, balafirên şer û helîkopteran êriş dike û dixwaze dagirkeriya xwe bwefireh bike.
Li gorî daxuyaniya HPG’ê dagirkeriya Tirk di şevên 17, 18 û 19’ê Nîsanê de bi helîkopterên êrîşê û balafirên şer Qadên Berxwedanê ya Girê Ortê û Girê Çarçel bombebarankirin, herwiha êrîşa dagirkeriyê ya di şeva 19’ê Nîsanê de li qada Şêlazê, ber bi qada Dergelê ve berfireh dibe û dewam dike û di rewşa heyî de qadên Girê Hakkarî, Girê Çarçel, Girê Şehîd Çekdar, Girê Şehîd Piling, Girê Ortê, Asê, Yekmalê, Xirabê, Xankê, Şêlazê û Dergelê di hedefa dagirkeriyê de ne.
‘Armanca Erdogan ew e ku dagirkeriyê rewa bike’
Di heman çarçoveyê de û di derbarê serdana Erdogan ji Bexda û Hewlêrê re, Komîteya Têkîliyên Derve ya KCK’ê bi daxuyaniyekê bang kir ku li dijî planên dewleta Tirk a ji bo êrîşên nû û dagirkirina xaka Iraqê, rabin û wiha got: “Her çendî ku armanca esas a serdanê weke têkîliyên bazirganî û ekonomîk tê diyarkirin jî, armanca Tirkiyeyê ew ku 87 baregehên xwe yên leşkerî yên li ser xaka Iraqê û dagirkeriya xwe ya li ser xaka Iraqê fermî bike û plana êrîşên xwe yên nû rewa bike. Dewleta Tirk bi vê yekê re û bi hinceta ‘ewlehiyê’ dixwaze qadên dagirkeriyê yên nû li ser xaka Iraqê veke.
‘Desthilatdariya Erdogan sivîlan qetil dike’
Di daxuyaniyê de hat diyarkirin ku desthilatdariya Erdogan mafê serweriya Iraqê binpê dike û qada wê ya bejahî û hewayî li gorî dilê xwe bi kar tîne û wiha hat domandin: “Her roj bi dehan êrîşan gund, baxçe, mal û wesayîtên Iraqiyan bombebaran dike û sivîlan qetil dike. Tirkiye van êrîşên xwe bi saya alîkariya siyasî, leşkerî û lojîstîkî ya PDK’ê pêk tîne. Gelê Kurd û civaka Iraqê, li dijî hevkariya Tirkiye-PDK û dagirkeriya Tirkiyeyê ye. Erdogan di ferqa vê yekê de ye û dixwaze hikûmeta Bexdayê jî bikêşe gel xwe, hem PDK’ê ji rewşa zehmet rizgar bike hem jî dagirkeriya li Iraqê mayînde bike. Divê were zanîn ku Tirkiye li qadên ku dikevitê bêaramiyê çêdike û etnîsîte, nasname, bawerî û mezheban bi kar tîne. Bi vî rengî polîtîkayekê ava dike. Dagirkeriya Tirkiyeyê ya li Qibrisê, kaosa ku hewl dide li Kerkûkê biafirîne, bi cih kirina hêza leşkerî ya li Lîbyayê ji bo ku DAÎŞ li xaka Sûriyeyê belav bibe mînakên şênber û vekirî ya alîkariya ji DAÎŞ’ê re ye.”
Daxuyaniyê bal kişand li ser desthilatdariya AKP’ê ya 21 salan a di bin serkêşiya Erdogan de, û wiha got: “ Di hilbijartinên 31’ê Adarê de têkçûneke mezin jiyan kir û cara destpêkê dikeve rewşa partiya duyemîn de. Vê yekê yekser bandor li siyaseta krîza ekonomîk a li Tirkiyeyê jî kiriye. Bi rengekî zelal hat dîtin ku desthilatdariya AKP’ê ne mayînde ye. Hikûmeta Bexda jî divê vê rastiyê bibîne û bi desthilatdariya Erdogan re nekeve angajmanên demdirêj.
Li hêla din, gerîlayên PKK’ê weke hincet tên nîşandan û amadekarî ji bo êrîş û dagirkeriyeke nû tê kirin. Ji salên 1980’î û vir ve tevgera me bi civaka Iraqê û dewleta Iraqê re li ser bingeha rêzgirtina ji hevdû re di nava têkiliyên dostane de ye û heta niha ti alozî, pevçûn û neyîniyên bi vî awayî rû nedaye. Berovajiya wê, di sala 2014’an de dema herî dawî êrîşên DAÎŞ’ê pêk hatin, gerîlayên Kurd li heman eniyê bi gelê Iraqê re ji bo parastina Mûsil, Kerkûk, Hewlêr, Şengal û Mexmûrê şer kirin û di dema parastina xaka Iraqê de bi sedan şehîd dan. Dema ev şer diqewimî, Tirkiyê destek dida çeteyên DAÎŞ’ê, ne gelê Iraqê.”
‘PDK’ê yekane hêz e ku xizmetê ji Tirkiyeyê re dike’
Di berdewamiya daxuyaniyê de ev tişt hatin ziman Rêveberiya PDK’ê yekane hêza Iraqê ye ku xizmetê ji mayîndebûna Tirkiyeyê li ser axa Iraqê dike. Divê PDK tavilê dawî li têkiliyên xwe yên bêyom ên bi desthilatdariya Erdogan re ku di nava pêvajoya jihev belavbûnê û hilweşînê de ye bîne; Divê di mijarên li dijî gelê Kurd û civaka Iraqê de bi Tirkiyeyê re hevkariyê neke.
‘Divê li dijî dagirkerî û hewldanên nû yên dagirkeriyê helwest bê nîşandan’
Divê civaka Iraqê, gelê Kurd, partiyên siyasî, rêxistinên civaka sivîl, rewşenbîr, nivîskar û çapemeniya Iraqê li dijî dagirkeriya Tirkiyeyê ya li ser xaka Iraqê û planên êrîşê yên nû derkevin. Divê li dijî dagirkeriya desthilatdariya Erdogan a li ser xaka Iraqê û hewldanên nû yên dagirkeriya di bin navê ‘rêya pêşketinê’, ‘peymana nû ya avê’ û ‘peymana hevpar a ewlekariyê’ helwest bê nîşandan.”
33 partî û rêxistinên Kurd, Ereb, Suryan, Asûrî dijî êrişên Tirkiyeyê bang kir
Derbarê heman mijarê û li dijî êrîşên dewleta Tirk a dagirker ku li ser Herêmên Parastina Medya û Başûrê Kurdistanê dide meşandin, 33 partiyên siyasî û rêxistinên li Rojavayê Kurdistanê û Herêma Bakûr û Rojhilatê Suriyeyê bi daxuyaniyekê bang li NY, YE, rêxistinên demokratîk, aştîxwaz, hêzên Kurdistanî û gel kirin.
Di daxuyaniyê de wiha hat gotin: “Dewleta Tirk rastiya feraseta xwe ya faşîst bi dijminahiya edalet, mafên gelan û binpêkirina serweriya dewletan a ku bi peymanên Neteweyên Yekbûyî (NY) hatine diyarkirin, nîşan dide. Hewldanên demokratîk li dijî berjewendiyên xwe dibîne, lewma qebûl nake. Dema li hemberî îradeya gel têk diçe jî, berê xwe dide êrişan.Rejîma Tirkiyeyê bi dagikeriya ku bi piştgiriya komên terorîst pêk tîne û di nava gelan de belavkirina şer û nefrete, her wiha binpekirina serweriya dewletan û avakirina qeyranên navxweyî re, dibe sedema sereke ya bê aramiya li herêmê. Ev hikumeta faşîst ji bo ku doza gelê Kurd a bidestxistina mafê xwe bidawî bike, komkujiyên herî mezin pêk tîne, çekên di qada navnetewî de hatine qedexekirin bikar tîne. Bi hemû hêza xwe hewl dide ku hêzên Kurd bikişîne nava êrişên xwe yên dijî gerîla, şerê Kurd bi Kurd derxîne. Em weke partiyên siyasî û rêxistinên Kurd, Ereb, Suryan û Asûrî yên li Rojavayê Kurdistan û Herêma Bakûr û Rojhilatê Suriyeyê van êrişên hovane bi tundî şermezar dikin. Em bang li NY, Yekîtiya Ewropayê (YE), hemû welat û hêzên aştîxwaz, demokrasîxwaz dikin ku pêşiya êrişên Tirkiyeyê yên li ser gele me bigirin û pirsgirêka Kurd bi rengî demokratîk û adilane çareser bikin. Em bang li hêzên Kurdistanî dikin ku dijî gerîla nekevin nava êrişên dagirkeriyê yên dewleta Tirk. Em bang li hikûmeta Iraqê û hikûmeta Herêma Kurdistanê dikin ku van êrişan red bikin nekevin nava şer û dijî êrişên Tirkiyeyê yên li ser axa xwe li Konseya Ewlekariyê ya NY’ê gilî bikin. Em bang li gelê xwe li her derê dikin ku bi awayekî girseyî bikevin nava liv û tevger, zextê li raya giştî ya cîhanê bikin da ku êrişên dewleta Tirk ên li her derekê bidin rawestandin.”
Ji bo destekdayîna gerîla xelkê herêmê daket qadan
Li Bakur û Rojhilatê Sûriyeyê jî ji bo şermezarkirina êrişên dewleta Tirk a dagirker û destekdayîna HPG`ê, meşên girseyî hatin lidarxistin.
Şêniyên bajar û navçeyên kantonên Herêma Bakur û Rojhilatê Sûriyeyê ji bo şermezarkirina êrişên dewleta Tirk a dagirker û destekdayîna berxwedana Hêzên Parastina Gel (HPG) ya li hember êrişên dewleta Tirk a dagirker, derketin qadan.
Şêniyên kantona Firatê, şêniyên bajarê Qamişlo, şêniyên navçeya Amûdê, şêniyên navçeya Çilaxa, şêniyên navçeya Til Birakê, Şêniyên bajarê Hesekê, şêniyên navçeya Dirbêsiyê û Şêniyên taxên Şêxmeqsûd û Eşrefiye yên Helebê meşên girseyî li dar xistin.
Li Bexdayê dijî sardana Erdogan û êrişan banga nîştimanî hate kirin
Komek çalakvan li meydana Tehrîr ya Bexdayê, dijî serdana Erdogan, êrişên dewleta Tirk a dagirker yên li ser Kurdistanê daxuyaniyek dan û gotin; “Armanc berfirehkirina dagirkerî û talankirinê ye, divê kolanên Iraqê dijî êrişan bêdeng nemînin. Dewleta Tirk bi hêceta parastina berjewendiyên xwe, dest bi êrişên berfireh kiriye, ji bo dagirkeriya ser xaka Iraq û Herêma Kurdistanê jî zemîn ava dike. Sedema êrişan jî bêdengiye. Tirkiye bi hêcetên ne rast şerê xwe yê di warê siyasî, aborî û leşkerî de dijî serweriya Iraqê dewam dike û di karûbarê welat de destwerdanê dike. Niha jî herêmek berfireh ya Iraq û Herêma Kurdistanê dagirkiriye. Desthilatdarên Iraq û herêmê paş perdeyê ve bi lihevkirinên ewlekariyê, çavê xwe li rastiya dewleta Tirk digirin û naxwazin dijî Tirkiyeyê pêngavan bavêjin. Ev jî ji bo êrişên ser xaka Iraqê zemîn çêdike. Serdana Erdogan ya ji bo Iraqê, di çarçoveya planên dagirkeriya li ser xak Iraq û Herêma Kurdistanê deye. Ji ber ku siyaseta dewleta Tirk ewe ku li her cihî baregehên leşkerî ava bike. Gefên Erdogan û Artêşa Tirk ji bo wêrankirin, qurbanî û dagirkirinê ye. Ji bo vê bang li hemû Iraqiyan dikin, bi taybet rewşenbîran dikin ku dijî êrişên Tirkiyeyê bêdeng nemînin. Em bang li desthilatdarên Herêm û Iraqê jî dikin, hemberî welat û xelkê welat, erkê xwe yê netewî pêkbînin.”
Bi ser Stêrk TV û Medya Haber TV’ê de hate girtin: Polîsan avahî talan kirin
Di heman çarçoveya êrişên li dijî hebûna gelê kurd û ji bo qutirina dengê rastiyê Polîsên Belçîka bi ser studyoyên Stêrk TV û Medya Haber TV de girtin, dest danîn ser kompûter û kel û pelên teknîkî û eşyayên mayîn jî parçe kirin û talan kirin. Polîs ji bo weşanê qut bikin, hemû kablo qut kirin. Polîsên Belçîkayê deriyê odeya Uplînk şikandin û ketin hundir û aletên di hundir de jî texrîb kirin. Polîs dema ketin hundir wezîfedarên ewlehiyê kelemçe kirin û dirêjî erdê kirin. Polîsan tundî pêk anîn.
Polîs qasî 4 saetan li avahiyê man û piştre bi kel û pelên ku desteser kirine re ji studyoyê çûn.Di dema serdegirtinê de, li bajêr cihê ku studyo lê ne, ji aliyê polîsan ve hate dorpêçkirin. Zêdeyî 200 polîs tevlî serdegirtinê bûn, di nav wan de polîsên rûgirtî û sivîl polîs jî hebûn.