Hemza Sêvo/ Qamişlo
Îro Yekîtiya Raghandina Azad (YRA) bi boneya Roja Rojnamegeriya Kurdî bi beşdarbûna gelek rojnamevan û mêvanan şahiyek li Komelegeha Mêrî Land a Siyahî a li bajarê Qamişlo li dar xist.
22’ê Nîsanê weke roja Rojnamegeriya Kurdî tê destnîşan kirin, ji ber ku di vê rojê de weke yekem amûra rojnemegeriya kurdî ji bo gelê kurd a bi navê Rojnameya Kurdistan berî 126 salan hat damezrandin.
Bi vê boneyê jî Yekîtiya Raghandina Azad şahiyek li dar xist.
Di destpêka şahiyê de hevserokê YRY’yê bixêrhatina hemû kesên amade kirin û piştre jî hevserokê YAR’ê Dilyar Cizîrî di derbarê dîroka rojnamegeriya kurdî de wiha da zanîn: “Ev 126 sal in ku rojnamegeriya kurdî di şert û mercên zehmet de xebateke bi nirx dike. Bi dirêjahiya vê dîrokê rewşa kurdan û rojnamegeriya kurdî gelekî zor û zehmet bû. Bi derketina Tevgera Rizgariya Kurdistanê li asta Kurdistanê tevî derfet ji bo pêşketina rojnamegeriya kurdî çêbû. Rojnameya Kurdistan a ji aliyê Midhet Bedirxan ve hat damezrandin, weke gava yekem bû ji bo rojnamevaniya kurdî. Her wiha di wê demê de rastî gelek êrişan ji aliyê dijminên kurdan ve hatin. ”
Piştre Edîtorê Rojnameya Ronahî Refîq Ibrahîm di pêşveçûna rojnamegeriya kurdî û rola şehîdên rojnameger ji bo diyarkirina heqîqet û demokrasiyê wiha got: “Di vê roja pîroz de em hevalên xwe yên rojnameger yên ku bi canê xwe ji bo heqîqetê feda kirin, bibîr tînin. Ji ber ku bi saya wan kar û xebata ragihandinê gihaşte vê astê û bingeheke xurt ji bo bidestxistina azadî ava kir. Vê rojê li hemû rojnamevanan pîroz dikin û bi hêvî ne ku dem bi dem çapemeniya kurdî pêş bikeve û li ser şopa şehîdên xwe bimeşin di serî de jî şehîd Seyd Avran. ”
Di pêşveçûna şahiyê de çend sitran ji çanda kurdî ji aliyê Koma Yekpar û Koma Cûdî yên hunerî ve hatin gotin. Piştre jî bi boneya Roja Rojnamegeriya Kurdî jî xelata Kedê ya Mezlûm Bagok a salane ku ji aliyê YRA’yê hatin belavkirin. Rojnamevanên ku xelat wergirtin jî ev bûn: Xelata Kurdistanî ji bona Silêman Ehmed yê ku ev zêdeyî 6 mehaye ji milê PDK’ê ve hatiye revandin û tu agahî li ser wî nayên zanîn, xelata beşê dîtbarî ji bona pêşkêşvanê bernameya AX û welat Şerîf Mihemed hate dayîn, xelata wêrekiyê jî ji bona nûçegihana telvizyona RONAHÎ-TV Ciwana Cumaa û endama telvizyona JIN -TV Delîla Egîd hate dayîn, xelata beşê nivîskî jî ji bona rêveber û edîtora rojnameya Ronahî beşê erebî Berîvan Xelîl hate dayîn, xelata cîhanî jî ji bona rojnamevan û nivîskarê Misrî Ilhamî Elmilêcî hate dayîn. Her wiha ji bona beşê bihîstbarî jî xelat ji bona Hiyam Ebdella û. Herî dawî jî sipasnameyek ji bo Loristan Derwîş pêşkêşvana JIN-TV ji aliyê YRA’yê ve hat dayîn. Şahî bi stranan û gerandina govendê bi dawî bû.