Lîloz Hisên/ Qamşilo
Şêniyên kantona Qamişlo bi meşeke girseyî piştgiriya xwe ji berxwedana behmpa ya Gerîlayên HPG’ê re nîşan dan, herwiha êrîşên dewleta Tirka dagirker û xiyaneta PDK’ê bi tundî şermezar kirin.
Artêşa Tirk a dagirker ji 16`ê Nîsanê ve bi awayekî berfireh bi balafirên şer êrişî Herêmên Parastinê yên Medyayê yên li kir li Başûrê Kurdistanê dike. Li ser banga
Komîteya Însiyatîfa Gel, ji bo şermezarkirina êrişên dewleta Tirk û nişandana piştgiriya bi berxwedana gerîlayan re, şêniyên bajarê Qamişlo meşeke girseyî li dar xist.
Bi hezaran şêniyên Qamişlo tevlî meşê bûn, meş ji çerxerêya Sonî ya li navenda bajêr destpê kir û heta navenda Mihemed Şêxo ya Çand û Huner dewam kir. Di meşê de wêneyên Rêber Abdullah Ocalan û Gerîlayan, herwiha pankartên li ser nivîsên ( Bimre xiyanet, Bijî Berxwedana Zap û Metîna, Gerîla Rûmeta me ye) hildan.
Meş bi deqeyeke rêzgirtinê li ser giyanê şehîdan hat destpêkirin, piştre li ser navê TEV-DEM Xerîb Hiso axivî.
Xerîb Hiso di axaftina xwe de berxwedana Gerîla pîroz kir û wiha pê de çû: “Ev ne cara yekemîne ku dewleta Tirk êrişî Gerîlayan dike, rêjîma faşîst a Erdogan êrişî gel û îrdeya wan li her çar parçeyên Kurdistanê dike û hedefa qirkirinê ji xwe re kiriye esas, dixwaze têkçûna xwe ya siyasî di hundirê Tirkiyê de û li bakurê Kurdistanê veşêre.
Xerîb Hiso wiha domand: “Azadiya fîzîkî ya Rêber Abdullah Ocalan çareseriya tevahî pirsgirêkan e û xiyanetê jî tune dike. Hevkariya bi dijmin re têkçûne, kurdê ku êrişê qebûl dike tu nirxê kurdatiyê pê re tune ye. Sekina me giringe divê em berxwedan û têkoşîna xwe bilind bikin bi rojane em li kolanan bin û piştgiriya Gerîlayan bikin yên ku canê xwe feda kirin ji bo rûmeta me biparêzin.”
Li ser navê Kongra Civaka Demokratîk jî Mazin Harûnî axivî û wiha got: “Divê em bi ruhekî biratî bi hev re bijîn da ku kesên ku li ser xwîna gelan jiyan dikin hebûna wan
tune bikin. Dewleta Tirk xwe li ser nakûkiyên ku derdixe nava gelê kurd de, xwe ava dike.”
Mazin Harûnî di dawiya axaftina xwe de wiha got: “Weke sembol em dibêjin bijî biratiya gelan bi yek helwestî û dengî dibêjin na ji şer re na ji şerê birakujiyê re.”