Lîloz Hisên/ Qamişlo
Rêveberiya nivîsgeha Jin a Şaredariya Qamişlo Efîfe Elî Silêman destnîşan kir ku vekirina cafê Nêrgiz yek ji projeyên wan ên sala 2024’an bû û armanca wê jî pêşxistina aboriya jin a serbixwe ye. Her wiha Elîfe Elî diyar kir ku pêşxisitna pirojeyên jinan derfetên kar û xebatê li pêşiya jinan hîn bêhtir vedike û dihêle ku jin ji hemû milî ve hîn bêtir baweriya xwe bi xwe bîne.
Destekdayîna ji bona jinan ji hêla aborî ve wê bi xwe re gelek guhertinê di nava civakê de û bi taybet ji bona jinê pêkbîne. Pêşxistina pirojeyên taybet girêdayî jinê derfetê li pêşiya jinê bêhtir vedike ku bi rengekî hîn çalak tevlî nava kar û barên civakê bibe û ji sînorên malê derkeve û hîn baştir behreyên xwe bibîne û pêşbêxe.
Jin jî li kêleke mêr di hemû beşên jiyanê de cihê xwe digre û tu astengî li pêşiya tevlîbûna wê ji kar û xebatê re nîne û di roja îro de hemû zehmetî û astengiyên heyî derbaskirine û di civakê de bûye xwedî bandor.
Girêdayî pêşxistina pirojeyên jinê û pêşxistina abûriya wê rêveberiya nivîsgeha Jin a Şaredariya Qamişlo Efîfe Elî Silêman destnîşan kir ku di çarçoveya sala 2024’an vekirina Cafê Nêrgiz yek ji projeyên ku wan dabû destpêkirin bû û wiha got: Yek ji karên nivîsgeha Nêrgiz ew e ku xwedî li jinan û projeyên wan ên teybet derkevin. Di serî de me pirojeya Cafê Nêrgiz bi derfetên kêm vekir û armanca me ji vekirina wê jî xizmeta jinan û civakê bû û vekirina derfetên kar ji bona jinan bû.
Ji projeyên sala 2024`an (Nêrgiz Cafê)
Ji projeyên ku şaredariyê destpêkirbû yên girêdayî jinan di sala 2024’an Rêveberiya Nivîsgeha Jin a Şaredariya Qamişlo Efîfe Elî Silêman got: “Me komek ji projeyan di vê salê de lêkolîn kirbû, yek jê projeya vekirina Cafê Nêrgiz bû û bi vî rengî amedekarî ji bona pêkanîna wê çêbû. Cafê li bajarê Qamişlo û li taxa Siyahî hate vekirin. Pirojeya Cafê bi qasî mehekî ye ku amedekarî jê re tê kirin û neha amedeye ku pêşwazîkirina welatiyan bike.
Di Nêrgiz Cafê de wê tenê jin kar bikin, tê de vexwarinên sar û gerim wê werin pêşkêş kirin, armanc jê derfetên kar ji bo jinan û bi taybet jî jinên ciwan zêdetir werin vekirin û bi riya vê yekê hîn bi rengekî çalak cihê xwe di nava civakê de bigrin û her tim çavê wan ne li zilam be û li benda zilam be.
Rêveberiya nivîsgeha Jin a Şaredariya Qamişlo Efîfe Elî Silêman di berdewamiya axaftina xwe de got: “Ev piroje ji bona jinan ne projeya yekem e; li herêmê gelek pirojeyên mîna wê hatine vekirin û bi awayekî serkeftî kar û xebata wan bi encam bûye.
Efîfe Elî Silêman got ku: Pêwîste ku jin ji vî karî şerim nekin, ji ber ku ev karekî asayî ye li her deverê û li cîhanê jî jin bi hêsanî cihê xwe di gelek pirojeyên mîna van de û ji mêran zêde tirk digre û di karê xwe de jî serkeftin pêkanîne.
Efîfe Elî Silêman Wiha axaftina xwe domand:” Jinên ku dixwazin kar bikin dudilî nebin, ji ber ku jin jî mîna mêran ne û ne jê kêmtire. Her wiha divê her dem jin hewil bide ku hêvî û xewnên xwe bi destê xwe pêkbîne. Weke dij jî pêwîste ku projeyên taybetî ji bona jinan bêne vekirin weke karê xwaringehan û baxçeyên zarokan û hwd.. hemû projeyên hatine vekirin ji bo afirandina derfetên kar ji bona jinan û ji bona ku jin xwe nespêre tu kesî û bi xwe pêşeroja xwe diyar bike.
Projeyên Nivîsgeha Jin di Şaredariya Qamişlo de
Hêjayî bibîrxistinê ye ku nivîsgeha jin a şaredariya Qamişlo çend projeyên taybetî yên girêdayî jinan ava kirbûn, ji wan jî mîna Projeya Şiştina Cilikan ku çar jin tê de kar dikin û projeya Salona Werzîşê jî yek ji van pirojeyan bû.
Projeya Baxçeyên Zarokan li bajarê Qamişlo mîna: Baxçeya şehîd Awaz ku 11 mamoste tê de kar dikin û baxçeyê şehîd Ararat ku 6 mamoste têde kar dikin, baxçeyê şehîd Emîne 8 mamoste têde kar dikin.