Ronaz Silêman/Qamişlo
Di 4`ê Nîsanê de Nexweşxaneya Dil û Çav bi alîkariya Desteya Tenduristiyê Klînîkên dil û çav ji bona xizmeta gel vekirin. Rêveberê Nexweşxaneya Dil û Çav Mûaz Abdelkerîm diyar kir ku armanca vekirina klînîkên dil û çav xizmeta gel e.
Desteya Tenduristiyê ya herêma Cizîrê, ji bo ku xebata tenduristiyê pêşkêşî şêniyên herêmê bike, 21`ê Çile li taxa Enteriyê ya bajarê Qamişlo Nexweşxaneya Dil û Çav ava kir. Avayiya nexweşxaneyê ji 3 qatan pêk tê. Ya yekemîn a rêveberiya nexweşxaneyê, pêşwazî, arşîv, dîwan, hesabdarî, taqîgeh, dermanxane, odeya teweriya çînî (tebeq mihwerî) û beşa destwerdana lezgîn. Qata duyemîn a tedawiya nexweşiyên dil e. Ya sêyemîn jî ya tedawiya nexweşiyên çav e. Nexweşxane bi amûrên nû hatiye amadekirin. Nexweş li beramberî mizaxtinên sembolîk tên dermankirin. Ev mizaxtin ji nexweşxaneyên din kêmtire. Armanca vekirina vê nexweşxaneyê ew bû ku nexweşên dil û çav yên Herêma Bakur û Rojhilatê Sûriyê, ji bo tedawiyê êdî neçarî çûna derve nebin.
Klînîkên dil û çav heyanî 1.30 nîvro nexweşan pêşwazî dike
Ji xwe ji dema vekirina Nexweşxaneya Dil û Çav de, pêwîstiya nexweşxaneyê bi klînîkan hebû, da ku astengî bi nexweşan re dernekevin, lê derfet di wê demê de tune bû, lewra di 4`ê nîsanê roj rojbûna Rêber Abdullah Ocalan de, Klînîkên dil û çav di nexweşxaneya dil û çav de hat vekirin. Klînîk beşek ji Nexweşxaneya Dil û Çavan in (ku ew jî di cûreyê alîkariyê de nexweşxaneya tekane ya li ser asta Bakur û Rojhilatê Sûriyeyê ye. Ji alîkariyên ku klînîk pêşkêş dikin taqîkirina dil û çavan bi amûrên bijîşkî yên nûjen e. Deriyê Klînîkên Dil û Çav ji seat 8.30 heyanî 1.30 nîvro ji bo pêşwazîkirina nexweşan vekiriye, 7 bijîşkên pispor bi dil û çav di 24 seatan de dorbidorin, ev bijîşk di klînîkan de kar dikin heyanî 1.30 piştre jî derbasî beşê emeliyatan dibin û roja şemiyê beltalenye.
Derbarê vekirina Klînîkên Dil û Çav de Rêveberê Nexweşxaneya Dil û Çav Mûaz Abdelkerîm û yek ji dayikên nexweşa dil a bi navê Henan Tawiz ji rojnameya me re axivîn.
Mûaz Abdelkerîm diyar kir ku berî vekirina klînîkên dil û çav Kêmasî di istiratîcîya kar û xebatên nexweşxaneya dil û çav de hebû û wiha got: “Dema ku nexweşxane bê klînîk kar û xebat dikir, ji aliyê nexweşan ve hin zehmetî dihatin kişandin. Ji ber ku nexweşên dihatin şopandina karên wan ê tenduristî û hin pilansazî dihatin kirin, mîna îko, pîlankirinî ji aliyê bijîşkên pispor ve û ev nexweş vedigeriyan klînîkên taybet, di vir de nexweşan astengî didîtin, lewra ji bo ku pirogiramê nexweşxaneya dil û çav bi hemû awayî bê temamkirin, kar û xebat ji bona derbaskirina van astengiyan hat kirin.”
‘Klînîkên dil û çav bi şev û roj xizmeta gel dikin’
Mûaz Abdelkerîm eşkere kir ku cara yekê klînîkên bi vî rengî di nexweşxaneyan de tên vekirin û wiha got: “Li ser asta Sûriyê giştî klînîkên bi vî rengî ku di nexweşaneyan de têne avakirin tune bûn, ev cara yekê ye ku ev yek di nexweşaneya dil û çav de pêk hat. Her wiha ji bo vekirina van klînîkan, ji aliyê Nexweşxaneya Dil û Çav bi alîkariya Desteya Tenduristiyê ya Bakur û Rojhilatê Sûriyê ve kar û xebat hatibû kirin, hazirkirina wê ji aliyê Desteya Tenduristiyê ve hate kirin û avakirina wê jî bi pereyên ji sindoqa Nexweşxaneyê bû. Di asta klînîkên çav de jî beşê berçavkan û çavan hatin vekirin, her wiha klînîkên dil û çav di eyînî korîdorê de ye. Ji xwe klînîkên dil û çav di roja 4`ê Nîsanê roja rojbûna Rêber Apo de weke diyarî ji bo gel hat vekirin.”
‘Em’ê 24 seatan di xizmeta gel de bin’
Rêveberê Nexweşxaneya Dil û Çav Mûaz Abdelkerîm axaftina xwe wiha qedand: “Berî niha hewldanên me hebûn ku em van klînîkan vekin lê derfetên me tunebûn, lê di sala 2024`an de Nexweşxaneya Dil û Çav bi xwe giha wan derfertan ku klînîkan veke, ji xwe bi buhayeke gelekî kêm nexweş tên tedawîkirin, tenê weke alîkarî ji nexweşxaneyê re ye, ji ber nexweşxane bi xwe, xwe birêve dibe, carnan pêwîstî hebe Desteya Tenduristiyê dibe alîkar pêre, li gorî vê sîstemê klînîk jî jêre dibin piştgirî. Ji xwe di herdû klînîkan de amûrên herî pêşketî tên bikaranîn. Soza me xwedîderketina vê nexweşxaneyê ye, ji ber ev nexweşxane nirxekî bi keda şehîdan hatiye avakirin, li ser vê bingehê em ê 24 seatan di xizmeta gel de bin.”
‘Bi vekirina klînîkan nema zehmetiyan dibînin’
Di heman çarçoveyê de yek ji dayikên nexweşa dil a bi navê Henan Mihemed Tawiz ku ji bajarê Amûdê ye kêfxweşiya xwe ji vekirina van klînîkan re wiha anî ziman: “Bi vekirina van klînîkan barê me sivk bûye, berê em diçûn klînîkên taybet û yên taybet jî bûhabûn, lê niha em bi vekirina klînîkan nema zehmetiyan dibînin.”