Zana Roj/ Şehba
4’emîn festîvala Amara li herêma Şehbayê ku du rojan dewam kir bi gelek çalakiyên hunerî hat xemlandin. Hevseroka Desteya Ciwan û Werzîşê ya Kantona Efrîn û Şehbayê Emîna Haj Ebdo anî ziman ku Festîvala Amara ya 4’emîn bi armanca geşkirina rihê ciwantî û parastina çandê hate orgenîzekirin.
Bi dirûşmeya `Bi rihê şehîdan emê şoreşa çandê pêk bînin azadiya fîzîkî ya Rêber APO misoger bikin` Tevgera Ciwanên Şoreşger û Desteya Ciwanan û Werzîşê ya Kantona Efrîn û Şehbayê 4’emîn festîvala Amara bi rojeke hunerî bi dawî kirin.
Festîvala Amara di 8 ê heyvê de bi roja xwe ya hunerî het orgenîzekirin. Roja 2 yemîn ji festîvalê li kampa Berxwedan bi tevlîbûna bi sedan ji gel û ciwanan hat li darxistin. Di bernameya festîvalê de gelek komên stran û guvendan ji Kevana Zêrîn, Tevgera Çand û Hunerê her wiha komên Ciwana û yên zarokan hate xemilandin.
`Festîvala Amara ji bo tevgera ciwanan xwedî cihekî pîroz e`
Di destpêkê de axaftin bi ser navê Tevgera Ciwanên Şoreşger ya Efrîn û Şehbayê ji aliyê Zûlfiqar Nêrebiyê ve hate kirin. Zûlfiqar di axaftina xwe de festîval li hemû ciwanan pîroz kir, her wiha bal kişand ser îradeya ciwanan û wiha got: “Festîvala Amara ji bo tevgera ciwanan xwedî cihekî bi nirx û pîroze. Her çiqas em di şert û mercên zehmet ji siyaseta dorpêçê û êrîşên dagirkeriyê re derbas dibin, lê dîsa jî me kariye em festîvaleke di vê astê de li dar bixin. Ev yek jî îsrar û hêza îradeya ciwanan dide nîşandin. Bi hêvî ne bi vê rihê em xwedî li xeta şoreş û Rêbertiyê heta dawiyê derbikevin”.
Bernemeya festîvala Amara
Bernameya festîvalê wiha bû: Helbesta kurdî ji aliyê jina ciwan Dinya û bi zimanê Erebî ji aliyê Mihemed Wê ve hatin pêşkêş kirin, koma strana ya jinên ciwan ya şehêd Nûcan Seros, koma govend; ya zarokan yê Şehîd Reşîd, koma stranan ya pêkhateya Ereb yê şehêd Îlan Sara, koma Çand û Hunerê ya stranan, koma govendê ya Dibistana Şehêd Kendal, koma Kevana Zêrîn ya stranan, stranên tekane hunermend Kemal û koma Mîrko ya govendê yê ciwanan.
Di dawiyî de hemû kom, girop û kesên ku tevlî festîvalê bûne ji aliyê Tevger û Desteya Ciwanan ve hatin xilatkirin.
Di derbarê Festîvalê li ser asta 2 rojan de Hevseroka Desteya Desteya Ciwan û Werzîşê ya Kantona Efrîn û Şehbayê Emîna Haj Ebdo ji rojnameya me re axivî.
`Amara Xwedîderketina li keda Rêber Apo ye`
Emîne di destpêkê de anî ziman ku ji bo xwedîderketina li keda Rêber Apo festîvala Amara hat amedekirin û wiha got: “Ji me û tevahî gelê Kurd û yê azadîxwaz hebûna Rêber Apo û felsefeya azadiyê yak u pêşkêşî tavahî cîhanê kiriye hebûneke pîroz e, derketina festîvala Amara jî bingeha xwe ji ew xaniyê kevnar ya gundê Amara yê digire. Bi taybet xwedîderketina ciwanan li ked û têkoşîna Rêber Apo her wiha perspektîvên ku Rêber Apo ji bo ciwanan pêşkêş kirine em bikaribin bikin terzê jiyana ciwanên serdemê. Di heman demê îsal me xwest bi buneya rojbûna rêbertî em 4’emîn festîvala Amara yê li dar bixin. Da ku hêz û îradeya ku rêbertî da ye ciwana her tim mayînde bimîne”.
`Ciwanên Kurd li 4 perçeyên Kurdistanê xwe îsbat dikin`
Emîna bi van gotinan axaftina xwe bi dawî kir: “Li hember tavahî siyasetên şerê taybet yên ku bi ziraviyên xwe li ser hêza ciwanan tê meşandin, di heman demê li hember tavahî êrîş û hedefgirtinên dijmin yên li ser herêm û ciwanan pêk tîne, pê ve girêdayî pêkanîna siyaseta birçîbûn û lawazkirina hêza îradeya gel li herêmê ya ku ji aliyê Hikumeta Şamê ve tê feriz kirin. li hember van hemû cureyên qirkirina gelê Kurd û bi taybet têkbirina hêza ciwanên Kurd em bi biryardarî, îsrardarî, li ser paradîgmeya Rêber APO û di xeta têkoşîna 50 salî de berdewam kirin. em soza têkbirina van polîtîkeyan didin. Hêza ciwanên Kurd li 4 perçeyên Kurdistanê bi helwest, îdeolojî û piratîka xwe, xwe îsbat kiriye. Vê care jî 4’emîn festîvala Amara bi armanca geşkirina rihê ciwanan her wiha li ser esasê parastina çanda mirovan ya resen xwe îsbat kir û bi ser ket”.