Zana Roj/ Şehbay
Cejina Remezanê yek ji pîroztirîn cejinên muslmanan e. Gelê Efrînê yên musliman li herêma Şehbayên tevî hemû astengiyan, amedekariyên pêşwaziya cejnê dikin. Girêdayî vê yekê jî welatiya bi navê Zeyneb Obê cejina Remezanê li hemû mislmanan pîroz kir û got, ew bi hêviya ku cejinên dema pêş li Efrînê pîroz bikin.
Cejina remazanê di ola islamiyê de bê şîrove cejneke kevnar e. Hemû civaka islamî bi hezkirin û rêzdariyeke pir mezin vê cejina ku piştî meha Rojiyê tê; pîroz dikin.
Herwiha hemû muslman ji welat û netewên cîhanê yên cuda vê rojê pîroz dikin. Ji lewra cejineke li ser asta cîhanê tê naskirin û pîrozkirin. Gelê kurd yên musliman jî li gorî merasîm, urf û adetên vê cejinê amedekariyên xwe dikin û pîroz dikin.
Amedekariyên pêşwazîkirina Cejina Remazanê li Şehbayê
Li herêma Şehbayê gelê Efrînê rûxmî hemû siyasetên ku dijmin li ser wan dide meşandin ji ambargoya hikumeta Şamê û êrişên dagirkeriya Tirk, lê ji 6 salan ve, ev cejin li gorî marasîmên wê yên kevnar pîroz dikin.
Herêma Şehbayê bi rengê xwe îsal jî pêşwaziya cejina Remazanê dike. Tevî derfetên kêm, zehmetiyên aborî û siyaseta dorpêçê, lê gelê herêmê û gelê Efrînê weke her car bi vîna xwe ya ku tu carî têk neçûye bi hev re ji çêkirina şêraniyên cejinê bigire heyanî geşbûna bazaran, amedekariyên cejina Remazanê tên kirin.
Weke ku tê xuyakirin gel li ser xeta berdewamkirina berxwedaniyê û têkbirina hemû pilanên ku li ser wan tên meşandin, îsal jî di nava gel de hezkirin û tevgereke geştir ji cejinê re tê xuyakirin. Hemû sûk û bazarên herêmê bi rengê cejinê hatine xemilandin. Ev yek jî careke din îradeya gelê heyî li hember hemû cureyên siyasetan dide nîşandan.
Cejina Remazanê li gel efrîniyan bê Kumbeyan derbas nabe
Herêma Efrînê û bi taybet dayîkên Efrînê cejina Remazanê bê çêkirina Kumbeyan (Kulîçe) ne pêşwazî dikin û ne jî pîroz dikin. Çanda çêkirina Kumbeyan li gel herêma Efrînê çandeke xwe di disipêre sedên salan. Her cendî cureyên şêrînahiyan hebin û bên çêkirin, lê Kumbe ya herî sereke ye, ew cureyekî ji şêraniyan tê pênasekirin. dayîkên Efrînê bi taybet di cejna remazanê de çêdikin, hema hema bêje malek namîne bêyî ku Kumbe tê de nîn be. Herwiha malbatên ku nikaribin vê şêrînahiyê çêbikin, cîran û malbatên derdor wê malê bê Kumbeyan nahêlin. Ev çandeke û heyanî vê kêliyê gelê Efrînê parastiye.
Derbarê amadekariyên gel yên di kampan de ji bo cejina Remezanê, welatiya bi navê Zeyneb Obê ji rojnameya me re axivî.
Bi qasî êş û azarên koçberiyê dikarin hewildana şadkirinê dikin
Welatiya bi navê Zeyneb, ji 6 salan ve di kampa Berxwedan a li Şehbayê de jiyan dike. Wê di axaftina xwe de bal kişand ser amedekarî û zehmetiyên gel di pêşwazîkirina cejinê de û wiha axivî: “Em ji 6 salan ve koçberin û di kampan de jiyan dikin. jiyana rojane tê jiyankirin, amadekarî tiştekî ne hêsan e, bi taybet cejin û munasebetên din jê re amedekarî û pêşwazîkirin divê. Ev yek jî hinekî bi zehmetî tê kirin. Lê dîsa jî em li gorî urf û adetên xwe bi qasî em dikarin em pêşwaziya cejina Remazanê dikin. Bê guman dema em li Efrînê bûn amedekariyên me ne di vê astê de bûn, lê îro rûxmî kêmbûna kehrebê û derfetan em hewil didin dilê zarokên xwe bi çêkirina şêrînahiyên cejinê û bi taybet bi çêkirina Kumbe yan şad bikin. Ez jî weke dayîkeke Efrînê min Kumbe ji malbatê re çêkirin. ”
‘Bi hêviya ku cejina were, li Efrînê bê pîrozkirin’
Zeyneb bi hêviya vegera li Efrînê, axaftina xwe bi dawî kir û wiha got: “Bi derbasbûna 6 salan ji dagirkeriya li ser Efrînê re, ev nayê wateya ku em Efrînê ji bîr dikin. Em her kêlî û her cejin bi hêviyên mezin yên vegera Efrînê bi dawî dikin. Lema jî bila dijmin nefikire ku me dest ji axa xwe berdaye. Em cejina Remazanê li hemû gelê kurd û civaka muslimantiyê pîroz dikin, em bi hêvî ne ku sala bê em vê cejinê li Efrînê pîroz bikin. ”