Ayşa Silêman/Qamişlo
Di avakirina Netewa Demokratîk de, rola sereke dikeve ser milê jinan. Asta azadbûna jinê ya ku bandora xwe li demokratîkbûyînê bike jî, wê bibe bingehek xûrt, mayînde û kûr ji bo azadiya civakî.
Pêvajoya avakirina Netewa Demokratîk, di demên şer de hîn zêdetir bi zehmet û ji her pêvajoyekê zêdetir pêdivî bi kedê heye. Ji ber ku pergala demokratîk û dewletê wê zik hev de bin, dewlet wê vê pergalê ji bo xwe her dem wek faktoreke gef xwarinê bibîne, ji bo wê jî vê serî li rêbazên dewisandin, paşde xistin, berovajî kirin û rizandinê bide. Di vê wateyê de, ji bo ku jin bikaribin di xebatên neteweya demokratîk de pêşengiyê bikin, pêwîste di her alî de, bi berfirehî û kûrahî xwe birêxistin bikin ku ev yek hem ji bo pêşeroja jinan û hem jî ji bo pêşeroja civakê pir girîng e. Pejirandina jiyana demokratîk, Rêveberiya demokratîk, zîhniyeta têkiliyên demokratîk di nav jinan de, yek ji tişta herî serekeye û nabe dest jê bê berdan. Pêwîste bê zanîn ku qalibên tevger û zîhniyeta koledar bi giştî jî kapîtalîzmê ji bo jinê rewa dibînin, ev yek astengiyên herî sereke yên li pêşiya demokratîk kirinê ne. Ji bo demokrasî û azadiyê, bi qasî ku pêdivî ji holê rakirina serdestiyê heye, pêdivî bi derbas kirina kesayetên kole jî heye. Pêwîste jin xwe bigihîne qadek berfireh a rêxistinî, ku ji aliyê siyasî, çandî, civakî, aborî, xwe parastinê û li ser vê bingehê ji civakê re pêşengtiyê bike.
Pergal herî zêde malbatê dike hedef
Xebatên birêxistin kirinê yên jinan li her çar parçeyên Kurdistanê û hewldanên zîndî ya yekîtiya netewî a ji hêla ruhî û pratîk de, nêzikatiyên kolektîf yên bi jinên herêm û cîhanê hêlişt ku rewşa tevlîbûnek çalak a di qada civakî de çêbibe. Yek ji xebatên herî girîng a polîtîkbûn an jî azadbûnê ye. pêwîste jin, polîtîkbûnê ji rastiya dewlet cûda bikin, li ser bingehê azadiya zayendî, nêzikatiyek hevseng a nirxên gerdonî û netewî hertim xwedî derbikeve û pêş bixe, ev yek jî rê li ber qadên jiyana azad vedike. Qada civakî a neteweya demokratîk yek ji wan qadane ku pêwîste herî zêde nirxên madî û manewî yên jinan bi awayek herî bihêz tê de bê raber kirin. Her wiha yek ji wan qadane ku herî zêde dibin rûxandina pergalê de maye. Ev dewletên ku bi saziyên zilamê serdest li ser lingan dimîne û di heman demê de feraseta ku derveyê vê jiyanê, jiyana hilbijartinê nîne li ser jinan ferz dike. Heta ku tevahiya civakê nas bike ku jiyana hilbijartinê heye, pêwîste di qadên xweser an jî taybet yên jinan de çareserî bên nîşandayîn, tevlîbûn ji qadên civakî hîn zêdetir bibe û girîng e ku desthilatdarên ku sînorên teng yên mirov kûr dike, nemînin. pêwîste pîvana bingehîn azadîxwazî, wekhevî, polîtîkbûn, exlaqî û civakî be.
Di pergala kapîtalîst de jiyana civakî tenê bi malbatê re nayê sînordar kirin. Têgeha neteweperest, zayendperest, olperest û desthilatdar di tevahiya saziyên dewletê de li ser kar e, jin û civak tê perçe kirin, dijminahî di navbera wan de tê belav kirin, ji hêzê tên xistin. Raman, ziman, tevger û piskolojiya wê tê birêve birin. Civakên nexweş û ne saxlem tên avakirin. Rastiya netew-dewletê ne tenê pêkanînên xwe yên bişavtinê di ziman û çand de dide jiyan kirin. Kesî neçar dike ku heman xwarinê bixwe, eynî tiştan vexwe, heman cilan li xwe bike, heman şêweyê têkiliyan bijî, qiyasa bedenê wan wek hev be, xwedî heman tevger û nizikatiyan be, bi heman terzî bikene-bigirî. Ji bo vê jî hebûna jinên Kurd a li çiyayên azad xwedî girîngiyek mezin e. Ligor van derfetan, derxistina holê a nasnameya jina azad pir girîng e.
Têkiliyên hevjiyana azad
Ji bo ku jin derbarê jiyana xwe de xwedî gotin bin, pêwîste berî her tiştî bi hêz bin. Ji bo têkiliya ku bi civak, xweza, zilam re dideynin, li ser bingehê bi xwe bawer bûn û seknek saxlem be, bihêz bûn pêwîste. Hêza jinê ji birêxistinbûna wê a şexsî û kolektîf tê. Têkiliya hevjiyana azad a ku Rêber Apo daye diyar kirin, xwe dispêre ´xwebûn´a jinê, demokratîkbûna zilam û rastiya civakîbûnê. Hevjiyana azad, formeke pirr girîng a li dijî zincîrên koledariyê yên berî pênc hezar salî ye. Pergala koledar çiqas di hiş û mêjiyê me de hatibe rûniştandin û çiqas civaka me hatibe bela kirin, avakirina hevjiyana azad ewqas jî kedê dixwaze. Dema ku em di nav pirsgirêkên civakî yên heyî de, wek girêyek kûr lê hatiye dijîn. Lêgera sekna hevjiyana azad, egera nasnameya jina azad be, ne pêkan e dest jê bê berdan.
Yek ji pêdiviya jinan jî xwe parastin e
Civaka ku nikare xwe biparêze, wê her dem bi tehlûkeya dagirkerî û mêtîngehiyê re rû bi rû bimîne. Jinên Kurd di vê mijarê de xwedî tecrubeyên mezin in. Girêdayî vê yekê, li bajar, gund û taxan pêşxistina birêxistinbûnên jinan a ji hêla parastinê de yek ji pêdiviyên herî bingehîn e. Di van rojên ku em tê de dijîn, qirkirina jinê, tundî û destavêtin wek bûyerên rojane lê hatine, ji ber vê yekê girîngiya hêzên parastinê her roj zêdetir derdikeve pêş. Di heman demê de, di nav yekîneyên parastina gel de jî ji bo parastina civakê pêwîste hîn zêdetir hêza jinê cihê xwe tede bigire. Li Rojava hêza fermandar û şervanên jin yên di nav YPJ û YPG´ê de û asta wan a têkoşînê, mînaka herê ber bi çav ya rê li berpirsyariya jinê a ku xwe û civakê biparêze derxistiye holê.
Avakirina Neteweya Demokratîk evîn û azweriyek mezin dixwaze. Herwiha jin û gel li hemberî hêzên desthilatdar tu caran evqas bi hêz nebûne, nirxên xwe yên madî û manewî tu caran evqasî bi hêz amade nekiribûn, lê pergala şaristaniyê jî di tu demê de wiha pûç nebibû. Jin divê bi hêza xwe ya birêxistinbûyîna pratîk, hizrandin û hest, ji avakirina Neteweya Demokratîk re pêşengiyê bike û bi vê yekê re rola xwe ya dîrokî bileyze, li ser vê bingehê jî ji keda şehîdan re bi xwedî derketina ji jiyana azad re erk û berpirsyariyên xwe bi cih bîne.