Êrîşên dagirkeriya Tirk yên li dijî herêmên Efrîn û Şehbayê bi giranî dewam dikin, di meha Adarê de ciwanek şehîd bû û yek jî birîndar bû. Koçberên Efrînê yên li Til Rifetê li hemberî êrîşên dagirkeriyê sekna gel destnîşan kirin û gotin, “Faşîzma Tirkiyê bi topbaranên rojane wê nikaribe îradeya me ya mayînê têk bibe.”
Zana Roj/ Şehba
Ji bilî kuştin û sûcên ku dagirkeriya Tirk û komên çeteyan di Efrîna dagirkirî de dikin, rojane koçberên Efrînê yên ku li herêma Şehbayê dimînin tên hedefgirtin. Di van hedefgirtinan de bi giştî sivîl tên armanc kirin. Her wiha zirarên madî bi gel dide jiyan kirin. Faşîzma Tirkiyê ji roja destpêka derbasbûna gelê Efrînê ji herêma Şehbayê re rojekê jî êrîşên xwe nedane rewestandin. Ev êrîş di asta yekemîn de bi armanca têkbirina îradeya gelê Efrînê û valakirina herêmê tên kirin. Lê sekin û îdiyaya berxwedanî û têkoşînê ya ku ji 6 salan ve ji aliyê gelê Efrînê tê raberkirin, hemû plan û hêviyên dagirkeriyê têk birine.
Têkildarî êrîşên dagirkeriyê li ser herêmê koçberên Efrînê Eliya Erselen û Hikmet Çûlaq yên ku li navçeya Til Rifetê dimînin ji rojnameya me re axivîn.
`Faşîzma Tirkiyê careke din îradeya gel hedef digire`
Eliya anî ziman ku tu carî dagirkeriya Tirk êrîşên xwe ranawestîne û wiha got: “Ji roja derketina me bi darê zorê ji Efrînê û bicihbûna me li herêma Şehbayê dagirkeriya Tirkiyê kêliyekî jî êrîşên xwe li ser gelê sivîl nedaye sekinandin. Di qonaxa duyemîn ji Berxwedana Serdemê de faşîzma Tirkiyê bi dehan komkûjî li ser gelê sivîl û bi taybet li ser zarokên Efrînê dane pêk anîn. Her roj herêma Til Rifetê û gundê navçeya Şêrawa yê girêdayî Efrînê her wiha herêma Şehbayê ji aliyê dagirkeriyê ve tê topbaran kirin. faşîzma Tirkiyê rûxmî hemû sûc û binpêkirinên tunekirina nasnameya Kurd di Efrînê de dide meşandin, careke din jî dixwaze îradeya gelê Efrînê yên ku koçber bûne bi hovîtiya xwe têk bibe.”
`Sivîl dibin qurbaniyên hovîtiya dagirkeriyê`
Eliya diyar kir ku di encama êrîşên dagirkeriya Tirk de sivîl dibin qurbanî û wiha pê de çû: “Faşîzma Tirkiyê li pêşiya raya giştî dide diyarkirin ku ew hêzên leşkerî û PKK hedef digire. lê di rastiyê de rojane sivîlên herêmê ji koçnerên Efrînê û hemwelatiyên resen tên hedef girtin û şehîd dikevin. Bi taybet gundewarên nêzî Efrîna dagirkirî rojane bi tundî tên hedefgirtin. Zeviyên hemwelatiya tên bobabaran kirin, êdî gel û cotkar nikarin derbasî zeviyên xwe bibin. Weke ku di heyva Adarê de hatiye dîtin di encama hedefgirtina sivîlan de ciwanek 17 salî şehîd bû û birîndar çêbûn. Ev bûyer hemû didin eşkerekirin ku faşîzma Tirkiyê zarok, însanên temen mezin, gelê sivîl û hêzên leşkerî hedef digire.”
Li hember qirkirinê… xurtkirina têkoşînê
Herwiha Hikmet anî ziman ku armanc ew e ku îradeya gelan têk bibe û wiha domand: “Em hemû nêzîkatî û dijminahiya faşîzma tirkiyê li hember gelê Kurd dizanin. Dagirkeriya Tirkiyê bi dagirkirina Efrînê re nikarî bigihîna armanca xwe ya sereke ew jî tunekirina hêvî û îradeya gelê Kurd ya azadî û demokrasiyê. Ji bo gelê Efrînê jî ev yek armanc dikir û bi hemû êrîşên
hovîtî, rê û rêbazên qirkirinê tenê dixwaze îradeya gelê ku ji 50 salî ve li pey felsefeya azadiyê ya Rêber APO dimeşe têk bibe. Gelê Efrînê li herêma Şehbayê dîrokeke nû ya îradeya berxwedaniyê û têkoşînê nivîsandiye. Ma îradeya gelê ku li ser bîrdoziya Rêbertî mezin bûye têk diçe?. Em bi doza xwe bawrin û em her roj bi hêviya vegera Efrînê jiyan dikin û têkoşîna li hember dagirkeriyê mezin dikin.”
Hikmet bi van gotinan axaftina xwe bi dawî kir û wiha got: “Berxwedaniya ji 6 salan ve li hember êrîşêm dagirkeriyê, dorpêça Hikumeta Şamê û siyasetên ku li ser me tên meşandin kêliyekê jî nehatiye rawestandin. Li ser van bingehan tu hêviyên me bi kesekî û hêzekî nîne. Em baweriya xwe tenê bi şervanên warê zeytûnê û felsefeya Rêbertî tînin. Mayîndebûna me li vir hemû pilanên dijmin têk birine.”
Li gorî bîlancoyên Navenda Ragihandina HRE’yê êrîşên meha Adarê wiha ne:
Di roja 4’ê Adarê balafira keşfê a dewleta tirk a dagirker bi 5 rokêtên li gundê Alqamiyê bombaran kir. Di encama bombaranê sivîlek birîndar bû. Di roja 10’ê adarê Druna xwekuj a dewleta tirk a dagirker li gundê Kefer Anton xwe teqandin. Lê tu zirar Ninin. Di roja 13’ê adarê Druna xwekuj a dewleta tirk a dagirker li gundê Soxanekê xwe teqand lê tu zirar çênebûye. Di roja 14’ê adarê Druna xwekuj a dewleta tirk a dagirker 2 caran li gundê Soxanekê xwe teqand lê tu zirar çênebûye. Di roja 16’ê adarê Druna biçûk a dewleta tirk a dagirker bi 1 rokêt gundê Şewerxa bombaran kir, di encamê de tu zirar çê nebûye. Di roja 17’ê Adarê li gundê Alqemiyê ya navçeya Şera a kantona Efrînê, Keşfek mezin xistin. Di roja 17’ê adarê li gundê Bêlûniyê ya navçeya Til Rifatê welatiyên ku di nava zeviyên xwe de kar dikin kirin hedef, di encamê de ciwanekî 17 salî şehîd ket û yek bi temenê 43 salî jî birindar bû. Navê Şehîd: Elî Ebdulrehman Mihemed Navê Birindar: Mihemed Mihemed Sebrî Xalêt.
Di roja 23’ê Adarê li nêzî metheneya feysel ya nêzî baregeha rûsya drunek xwekuj bombe baran kir, di encamê de zirar nînin. Di roja 29’ê Adarê li gundê Şewarxa ya navçeya Şera ya kantona Efrînê, Druna bi çûk 6 gule li gund bombe baran kir, li gund zirarê madî çêbûn. Di roja 30’ê Adarê li gundê Malikiyê ya navçeya Şera a kantona Efrınê Drunek xwekuj a dewleta Tirk a dagirker bombe baran kir. Di roja 31’ê Adarê Drunek xwekuj ya dewleta tirk a dagirker gundê Şealê ya kantona Şehbayê bombe baran kir, di encamê de zirar madî ne.
HÊJMARA GİŞTÎ: Hêjmara Giştî Guleyên Obîsan: 773, Hêjmara Giştî Guleyên Hawanan: 615, Hêjmara Guleyên Tangê: 195, Hêjmara Giştî Guleyên Bombetar: 165, Hêjmara Giştî Keşfên hatine xistin: 1, Hêjmara Giştî Drunên Xwekuj: 10, Hêjmara Giştî Lêdanên Guleyên Drunên bi çek: 24