Îro Desteya Şeredariyê ya Kantona Efrîn û Şehbayê, bi daxuaniyekê serkeftina hilbijartinên şeredariyan yên DEM Partiyê yên li Bakurê Kurdistanê pîroz kir. Herwiha di daxuyaniyê de bi vê serkeftinê hat tekezkirin ku gelê kurd xeyalên faşîzma toranî hilweşand.
Zana Roj/ Şehba
Li herêma Şehbayê serkeftina partiyên kurdî di hilbijartinên ku li Tirkiriyê û Bakurê Kurdistanê hatine lidarxistin, bi coşeke mezin ji aliyê gel ve hat pîrozkirin.
Di 4’ê Nîsanê de Desteya Şeredariyê ya Kantona Efrîn û Şehbayê bi daxuyaniyekê serkeftina hilbijartin û perlementerên Şeredariyên gel li Bakurê Kurdistanê pîroz kir.
Herwiha daxuyanî bi zimanê erebî û kurdî ji aliyê Elîf Mihemed û Şervîn Şêxo ve hat xwendin.
Daxuyanî jî wiha hat destpêkirin: “Dewleta Tirk a faşîst ku polîtîkayên herî qirêj meşandin û hîna jî dimeşîne, ji dîroka xwe ya osmanî ya bi xwîn li dijî gelên herêmê û heta niha bi îdeolojiya xwe ya DAIŞ’î ku di şexsê AKP-MHP’ê de temsîl dike, û ji bo berdewamiya zihniyeta xwe ya neteweperest û nijadperest hemû şert û helwestan
li gorÎ xwe bi kar tîne. Herwiha bi rê û rêbazên curbecur, ji kuştin, girtin, qirkirina çandan û berovajîkirina hemû rastiyan li pêşberî raya cîhanî, hewl dide îradeya gelan bişkîne û nasnameya wan ji holê rake.”
Xeyalên faşîzmê hilweşiyan
Di pêşveçûna daxuyanê de hate diyarkirin ku xeyalên faşîzma toraniya dewleta Tirk hat hilweşandin û wiha hat domandin: “Gelê me yê qehreman li Bakurê Kurdistanê ji hemû cîhanê û bi taybetî jî ji hikûmeta Erdogan re tekez kir ku tu siyaset rê li ber hêz û îradeya gel bigire tune ye. Di heman demê de nîşaneya herî mezin jî hilbijartinên şaredariyan yê li Bakurê Kurdistanê ne, ku ji faşîzma turanî re careke din îspat kir ku xeyalên wan li hember fikir û felsefeya demokrasiyê ya hemû gelan hilweşiya. Êdî dem dema şikandina zincîrên zilmê û serkeftina îradeya gelan e ku bi destên xwe dîroka xwe binivîsin. Dîroka komkujî û qirkirinê bi volkana serhildanan û qîrîna gelan a ku li ser her tiştî li Bakurê Kurdistanê bilind dibe ji holê rakin. ”
Bi dengê ‘Berxwedan jiyan e’ hilbijartin hatin pîroz kirin
Di dawiya daxuyaniyê de bi silogana ‘Berxwedan jiyan e’ hilbijartinên Bakurê Kurdistanê hatin pîrozkirin û wiha hat gotin: “Em li kantona Efrîn û Şehbayê bi navê rêveberiya herêmî û şaredariyan serkeftina gelê xwe yê li Kurdistanê bi giştî û li Bakurê Kurdistanê bi taybetî li ser faşîzmê bi dengê xwe dibêjin ‘Berxwedan jiyan e pîroz dikin. Herwiha em ji Şehbaya berxwedêr dengê xwe bilind dikin û bi ruhê felsefeya Netewa Demokratîk em ê bi hev re faşîzma Tirk têk bibin û azadiyê bi dest bixin. ”
