Navenda Nûçeyan/Qamişlo
11`emîn salvegera damezrandina Radyoya Rojava ye. Radyoya Rojava di rewşên zor û zehmet de hat damezrandin û bû dengê şoreşê û her çiqas dijmin xwest wê bide rawestandin, lê bi îradeyeke xurt armancên wê vale derketin.
Radyoya Rojava ku di 1`ê Nîsana 2013`an de li çiyayê Qereçoxê dest bi weşanê kir. Dema ku Rojava û herêma Bakur û Rojhilatê Sûriyê di dîrokeke tijî berxwedan û serkeftinên binirx re derbas dibû. Radyoya Rojava jî şopdarê vê şoreşê bû û li gel pêşketinên leşkerî, siyasî û qada civakî para xwe di eşkerekirina rastiyê de hebû. Di rewşên zehmet de xwe gihandina hemû pêkhateyên herêmê û şiyariya civakî li hemberî dijminên dîrokî yên gelê bindest û azadîxwaz, yek ji hedefên sereke yên xeta weşangeriya Radyoya Rojava bû.
Damezrandina radyoya Rojava
Radyoya Rojava di hundirê odeyek biçûk de li quntara çiyayê Qereçoxê û bi alavên teknîkî yên kevin û derfetên kêm, dest bi weşana xwe kir û komek heval ku nîvê wan îro tevlî karwanê şehîdan bûne, karîbûn dengê rastiyê bigihînin cîhanê û berxwedana lehengî ya li himberî çeteyên kirêt, dagirkerî û zilmê belge bike. Her wiha di nava 11 salên derbasbûyî de û bi taybetî bi destpêkirina Şoreşa 19`ê Tîrmehê û avakirina Rêveberiya Xweser, projeyek ku bi fikir û felsefeya Rêber Ocalan pêk hat, Radyoya Rojava karîbû bibin dengê şoreşê.
Dengvedana dengê Radiyoya Rojava valaderxistina dagirkeran bû
Piştî 4 salan ji weşana Radyoya Rojava li çiyayê Qereçoxê, dewleta Tirk a dagirker bi balafirên xwe yên şer ku nêzîkî 25 balafir bûn, êrişî navenda Yekîneyên Parastina Gel (YPG) û Yekîneyên Parastina Jin (YPJ) û di nav de navenda ragihandinê ya Yekîneyên Parastina Gel û navenda Radyoya Rojava kir. Di êrişê de 20 pêşeng û şervanên (YPG û YPJ) di heman demê de 3 qehremanên çapemeniya azad ên radyoyê şehîd bûn. Dewleta Tirk a dagirker bi vê êrişa hovane xwest dengê azadî asteng bike, lê dengvedana Radiyoya Rojava û berxwedana şervanan, armancên wê vala derxistin.
Radyoya Rojava bi vîneke xurt dixebite
Radiyoya Rojava di roja îro de deng, helbest, berhem û efsaniyên berxwedaniyê yên şervanan radigihîne, kêlî bi kîlî dengê berxwedaniyê dişopîne. Piştî êrişa dagirkeriya Tirk a li ser Qereçox, di 10`ê Îlûna 2018`an de, Radiyoya Rojava bi vîneke xurtir careke din weşana xwe domand, gav bi gav û sal bi sal Radiyo Rojava pêş dikeve, her wiha weşana wê firehtir dibe. Niha 4 pêlên weşanê yên radiyo Rojava hene; li kantona Cezîrê li ser pêlên 91,2 û 88. 90 tê guhdar kirin, li herêma Firatê li ser pêla 93.5 tê guhdarkirin û li Helebê, Şehba, Izaz, Mari û Efrîna dagirkirî jî li ser pêla 108 F.M tê guhdarkirin.
