Birûc Resûl/Qamişlo
Meclisa Suriya Demokiratîk (MSD) derbarê salvegera Serhildana 12`ê Adarê, Kirîza Sûriyê û dagirkirina Efrînê li bajarê Qamilo, panêlek li dar xist.
Bi beşdarbûna partiyên siyasî, rêxistinên civaka sivîl û rûsipiyên herêmê, Mecilsa Suriya Demokiratîk li hola Zana ya bajarê Qamişlo panêlek li dar xist.
Di panêlê de li ser 3’ê mijarên sereke nirxandin hatin kirin û we jî wiha ne:
- Serhildana 12`ê Adara 2004`an, ji aliyê Emced Osman ve hat dayîn.
- Kirîza Suriyê, ji aliyê Hisên Ezam ve hat dayîn.
- Dagirkirina Efrînê ji aliyê Sewsen Reşîd ve hat dayîn.
Di vê çarçoveyê de endamê komîteya têkiliyan a Meclisa Suriya Demokiratîk Baqî Hemze ji
rojnameya me re axivî û wiha got: “Di sala 2004`an de ku rêjîma Bass komkujiyek li ser gelê kurd pêk anî, armanca wan ew bû ku tevlîheviyê di navbera kurd û ereban derxin. Li ser vê bingihê serhildana Qamişlo hat destpêkirin û deng li tevhî cîhanê veda. Serhildana Qamişlo ya 12`ê Adara 2004`an, tirsa rêjîma Sûriyê ji dilê gelê kurd derket. Her wiha êdî bi hemû hêz û îrade gelê kurd derketin qadan. Di heman demî de serhildana 12`ê Adarê bû hêz û îradeya xurt ji destpêkirina şoreşa Rojava û Suriyê re, êdî tirs nema û her kesên bêmaf, daxwaza mafê xwe kir. Serhildana 12`ê Adarê bandoreke mizin li ser tevahiya Suriyê kir.”
‘Bi fikirê demokiratîk em ê kirîza Sûriyê çareser bikin’
Endamê Komîteya têkiliyan a Meclisa Sûriya Demokiratîk Baqî Hemze di dawiya axaftina xwe de wiha got: “Daxwaze dewleta Tirk a dagirker ew bû ku Efrîn dagir bike û derbeyekî li Suriyê bixe. Niha jî wek tê zanîn ku dewleta Tirk a dagirker pirojeyê xwe ya Mîsaqa Milî li Efrînê pêk tîne. Ji ber vê yekê eger pirsgirêka Efrîn çareser nebe, wê demê pirsgirêka Sûriyê jî çareser nabe. Dewleta Tirk a dagirker naxwaze ku Kirîza Sûriyê were çareser kirin. Herwiha armanc ji vê panêlê ew e ku her kes bibe yek dest û yek fikirê demokirat, heya ku em muxalif bin û li gor berjewandiyê xwe tev bigerin, em bi ser na kevin.”
Panêl bi nîqaş û pêşiniyarên mêvanan hat bi dawî kirin.
