Vîndar Roj/ Şehba
Çalakvanê Hiqûqî Îbrahîm Şêxo têkildarî bûyera Şehîdxistina Ehmed Medê de got ku Sûc û kiryarên di Efrînê de tên kirin di asta yekemîn de Dewleta Tirkiyê ya dagirker berpirisyar e.
bûyera kuştin û şehîdxistina zarokê Efrînî Ehmed Medê li navçeya Cindirêsê ji aliyê hemwelatiyekî girêdayî çeteyan ve. Bûyera ku divê hêzên navnetewî û rêxistinên parastina mirovahiyê yên gilobal şerm bikin û xwe weke hêzeke berpirisyar li mafê mirovahiyê nebînin. Di seranserî 6 salan de ji dagirkirina bajarê Efrînê ji aliyê faşîzma Tirkiyê û komên çeteyan ve û siyaseta qirkirina gelê Kurd bi kuştinê tê kirin û qirkirina çandî bi riya guhartina demografiya herêmê tê kirin. Di salvagera 6 emîn a dagirkirina Efrînê di 18’ê Adara 2018 an de her roj tê îsbatkirin ku Efrîn di bin bêdengiyeke navnetewî de hêdî hêdî tê tunekirin. Têkildarî sûca kuştina Ehmed Medê yê 16 salî de li Efrînê Çalakvanê Hiqûqî Îbrahîm Şêxo ji rojnameya me re axivî.
`Bûyera Ehmed ne ya yekemîn e`
Îbrahîm di destpêkê de bal kişand ser sûca ku derheqê Ehmed de li Efrînê bûye û wiha got: “Ehmed zarokekî biçûkbû û bi destê çeteyên hov û tu par ji mirovahiyê negirtine hate kuştin. Di wê bûyerê de heyanî niha nehatiye zelalkirin ger kujerê Ehmed yek bû yan zêdetir bûn. Ji ber hin agahî hatin ku Ehmed ne bi destê yek kesî hatiye kuştin, lê heyanî niha jî hîn nehatiye eşkerekirin. Bê guman ev ne yekemîn care dixwazin siyasetekî taybet li ser zarokên Efrînê bidin meşandin. Beriya çend rojan zarokekî ji gundê Meydana yê 8 salî ku şivantî dikir ji aliyê çeteyên komên Feyleq El Şam ve bi gukeyan hatibû tirsandin. Ev bûyer hêrs û nifreta gel bilind kir û bi hezaran ji gelê Efrînê li Efrînê derketin qadan û bi girseyî nerazîbûna xwe anîn ser ziman”.
‘Koçberiya gelê resen armanc dikin’
Îbrahî Şêxo destnîşan kir ku dagirkeriya Tirkiyê û komên çeteyan bi van siyasetan koçberkirina gelê resen hedef digirin û wiha got:”dagirkeriya Tirkiyê û komên çete di 6 salan de hemû cureyên qirkirinê derheqê gelê Kurd de pêkanîn. Kiyarên dij mirovî û exlaqî her roj di Efrînê de tên meşandin. Rûxmî hemû binpêkirin û zexta ku li ser gel didin meşandin, lê di encamê de em dikarin bêjin Tirkiyê dixwaze tavahî gelê Kurd yên resen ji Efrînê bi darê zorê derbêxe û guhertina demugrafîk bi hemû rengî li Efrînê dike, da ku rengê Kurdewariyê bi carekê li Efrînê nemîn e”.
`Tikriyê berpirisyar e û divê hesab bê xwestin`
Herwiha Îbrahîm anî ziman ku bi hatina Newrozê re van siyasetan didin meşandin û dagirkeriya Tirkiyê berpirsê yekemîn e û wiha bi dawî kir: “Komên çeteyan bi her nêzîkbûna Newrozî re siyasetên gelek qirêj pêk tînin da ku gelê li wir ma ye jî Newrozê pîroz nekin. Sala par bi kuştina malbetekê ji malbata Pêşmerge li Navçeya Cindirêsê di şeva Newrozê de û ew yek bû sersebebê ku gel Newrozê Pîroz nekin. Hemû siyasetên talankirin, qirkirin û guhartina nasnameya gelê Efrînê di asta yekemîn de dewleta Tirk berpirisyar e. Ji ber ku ew dewleteke dagirker e û divê hesab ji Tirkiriyê bê xwestin”.
