Zana Roj/ Şehba
Rêxistina UN ya cîhanî, av li ser kampên koçberên Efrînê li herêma Şehbayê qut kiriye. Desteya Şeredariyê ya Kantona Efrîn û Şehbayê û gelê Kampan bi daxuyaniyekê ev siyaset şermezar kirin.
Gelê Efrînê yên ku 6 salin koçberî herêma Şehbayê bûne, di şert û mercên zehmet de di bin kona de jiyan dikin. Beriya 2 sala Rêxistina UN ya cîhanî av bi temamî li ser herêma Şehbayê da qut kirin û di 15`ê Sibatê de, av bi temamî li ser kampên koçberên Efrînê jî qut kirin. Li hemberî vê siyasetê, Desteya Şeredariya Kantona Efrîn û Şehbayê tevî gelê Kampan li Kampa Serdem bi daxuyaniyekê ev nêzîkatî şermezar kirin.
Daxuyanî bi zimanên Kurdî, Erebî û Îngilîzî hat xwendin.
Di daxuyaniyê de bal hat kişandin ser berxwedaniya gel, tevî hemû polîtîkeyan, her wiha helwesta UN şermezar kirin û wiha hat gotin: “Piştî derbasbûna 6 salan ji koçberkirina bi darê zorê ya gelên Efrînê ji herêmên xwe ber bi herêma Şehba ve, ji ber berjewendiyên siyasî yên welatên garantor li ser qada Sûriyê, ku gel berdêla wê di warê madî û manewî de dan, û ji bo yekîtiya xaka Sûriyê û ji bo jiyaneke bi rûmet li hember dijminê hov hê jî bedelên giran û buha didin, ev gelê dilsoz bi sekn û têkoşîn, tevî hemû êş û karesatan, li berxwe da, li ber xwe dide û wê li ber xwe bide, Li hemberî van hemû polîtîkayan bi hemû şêweyên dorpêçkirin û tirsandin, birçîbûn û şikandina îradeya gel, tevî wê em ji biryara UNICEF’ê ya qutkirina avê li ser gelê me yên li kampan matmayî ne û em di desteya rêveberiya herêmî û bi navê gelê me yên li kampan vê biryarê şermezar dikin, ku beşeke ji binpêkirinên li dijî mirovan û mirovahiyê bi tevahî û bi ti awayî xizmeta destûr û qanûnên ku rêxistin li ser hatine avakirin nake, Berûvajî vê ev biryar tenê tişta ku dewleta Tirk a faşîst bi qutkirina avê li gelê me yê Hesekê kir, tîne bîra me û biryara UNICEF’ê jî piştgirî dide van polîtîkayan.”
‘Pêwîste UN bi erkên xwe yên exlaqî rabe’‘
Di dawiyê de bang aliyên têkildar hat kirin û wiha hat gotin: “Em bang li aliyên pêwendîdar dikin ku biryarên bi vî rengî ji nû ve li ber çavan re derbas bikin, her wiha pêwîste zextê li UNICEF bê kirin da ku erkên xwe yên exlaqî û qanûnî li hember vî gelî pêk bîne.”