Li Rojavayê Kurdistanê gel ji pirtûkên Rêberê Gelê Kurd Abdullah Ocalan feyzê digirin û ev yek bandorek mezin li ser jiyana wan dike. Endama Rêveberiya Akademiya Civaka Demokratîk a Kantona Kobanê Cîhan Ebas têkildarî mijarê de got ku divê mirov di jiyana xwe de bi feraseta felsefe û nêrîna kûr a Ocalan tev bigere.
Cîhan Ebas anî ziman ku fikrên Ocalan bandorek erênî li ser jiyana wan dike û got: “Xwendina pirtûkên Rêbertî ji bo me gelek girîng e. Mirov çîqasî bikaribe, bi baldarî pirtûkan bixwîne, wê ewqas bikaribe gavên azadiyê bi fikrên xurt biavêje. Tiştên ku divê bibe parçeyek ji jiyana mirov, pirtûkên Rêberê Gelê Kurd Abdullah Ocalan in. Ji ber ku ji bo gelek kesan dibe naskirina fikrên azad. Li Rojavayê Kurdistanê jî gel bi eleqeyek mezin pirtûkên Serokatî dixwînin.”
Cîhan Ebbas diyar kir ku ji ber desthiladariya pergala BAAS’ê zimanê kurdî qedexe kiribû, gelek kesî bi zimanê xwe nizanibû û wiha domand: “Ji ber ku berî Şoreşa Rojava Rejîma BAAS’ê kurdî qedexe dikir û zilm li gel dikir, gelek kesî nikaribû pirtûkên Serokatî bixwenda. Lê niha gelek kes bi xwendina pirtûkên Rêbertî xwe bi pêş dixin. Yên ku pirtûkên wî dixwînin nêrîna wan a li hember cîhanê diguhere.”
Ebbas destnîşan kir ku encama ku tê girtin ew e ku fikrên Ocalan roj bi roj tên naskirin û wiha dawî li axaftina xwe anî: “Piranî di saziyên me de pirtûkên Rêbertî tên xwendin, bi taybetî jî parêznameyên Rêbertî. Her wiha di perwerdeyan de ev pirtûk tên xwendin. Em jî weke Akademiyê di perwerdeyan de her beşên pirtûkê, ji dayikên xwe re şîrove dikin. Asta xwendina pirtûkên Rêbertî fikir û felsefe da avakirin. Loma xwendina pirtûkên Serokatî parçeyek ji jiyana me ye.”…JINNEWS
Pirtûkên Ocalan bi eleqe mezin tên xwendin
