Hevseroka Yekîtiya Êzidiyên Herêma Efrînê Suad Hiso salvegera 4’emîn a Komkujiya Şengalê bi bîr anî û diyar kir ku fermana 74’an a ku li ser serê Êzidiyan pêk hat ji êrîşên li ser Êzidiyên li Efrînê ne cuda ye û diyar kir ku ew ê li dijî fermanan tu carî serî netewînin û li berxwe bidin.
Di 3’ê Tebaxa 2018’an de Çeteyên DAÎŞ’ê bi awayekî hovane êrîşî Şengalê kirin û komkujî pêk anîn. Bi hezaran kes qetil kirin û bi taybet jî jin hedef girtin. Bi hezaran jin revandin û ew li bazaran wekî koleyan firotin. Hevseroka Yekîtiya Êzidiyên Herêma Efrînê Suad Hiso têkildarî mijarê diyar kir ku wan hêza xwe winda nekirine ew li ser piyan e û got: “Ji dîrokê heta niha her dem Êzidî bi fermanan rû bi rû mane. Êzidî bi saya fikrên Rêber Apo bi hêztir bûne û berxwedana xwe domandine.”
Suad Hiso diyar kir ku ew bûne şahidên êşa fermana 74’an û got: “Dema ku çeteyen DAÎŞ’ê êrîşî Şengalê kirin di destpêkê de jin hedef girtin. Niha 3 hezar jin hîn destên çeteyan de ne. Divê hemû cîhan bibe yek û li dijî zilma ku li jinên Êzidî hatin kirin bisekinin. YPG/YPJ gihiştin hewara Êzidiyan û bi hezaran Êzidî ji komkujiyê rizgar kirin. Çeteyên DAÎŞ’ê dema ku êrîşî Şengalê kirin xwestin Êzidiyan tune bikin. Lê Êzidî tu car nayên tunekirin. Lê tevî hemû zordestiyan Êzidî li dijî zilmê sekiniye. Em ê têkoşîna xwe ya li dijî dagirkeriyê bidomînin.”…Lîlav Elî /Şehba
Em ê li ber fermanan serî netewînin
