Apê Ednan ji Kobanê ye, ev 15 sale di baxçeyên dar û kulîlkan kar dike. Di çandina dar û kulîlkan li kolan û gulistanan ji bo hawirdorek pak bi şaredariyê re dibe alîkar.
Kobanê piştî wêrankirina DAIŞ’ê niha bi dar û ber û kulîlkan şîn bûye. Apê Ednan Hemê yê 45 salî jinûve dest bi çandina dar û kulîlkan kir. Beriya niha bi 15 salan Apê Ednan di gulistanên dar û kulîlkan li Helebê kar dikir.
Apê Ednan ji biçûkahiya xwe ve koçberî Helebê bû. Bi destpêkirina şoreşa Rojava re çû Tirkiyê û piştre vegeriya Kobanê. Apê Ednan ev bû saleke ku vegeriya Kobanê.
Apê Ednan hema dest bi karê xwe kir û baxê yekemîne li ser asta bajêr bi navê Baxê Kobanê vekir.
Baxçê apê Ednan li aliyê başûrê rojavayê Kobanê ye. Apê Ednan tê de gelek şitlên kulîlk û darên berhemdar ji 37 cureyan difiroşe.
Apê Ednan dibêje ku armanca wî ji vekirina bexçe tevî bicihanîna debara xwe ya rojane, her wiha ji ber ku ew ji sirûştê hez dike.
Apê Ednan tekez kir ku ew bi Rêveberiya Xweseriya Demokratîk û bi Şaredariya Gel re ji bo çandina dar û kulîlikan li kolan û gulistanên giştî yên bajêr hevkariyê dike.
Apê Ednan diyar kir ku ew şitlan ji Helebê û Minbicê tîne.
Apê Ednan got : “Dar û kulîlik mîna xwedîkirina zarokan baldariyê dixwazin. Dema ez di bexçe de dixebitim derûniya min baş dibe.ʺ
Her wiha Apê Ednan spasiya Rêveberiya Xweseriya Demokratîk û Şaredariya Gel a Kobanê ji bo çandina dar û kulîlikan bi armanca şînkirina bajêr û parastina hawirdorê li bajêr, kir…ANHA
Apê Ednan dar û kulîlkan diçîne
