Rêxistina Roiya ya girêdayî UNESCO’yê bi piştgiriya Komîteya Turîzm û Şûnwaran a Meclisa Sivîl a Reqayê dest bi xebatên sererastkirina muzexaneya dîrokî ya kolana El-Mensûr a Reqayê kir.
Berpirsê xebatên sazkirinê yê rêxistina Roiya Umer El-Mûh wiha got: ʺMuzexaneya Reqayê ji şaristaniyên kevn ên ku li Reqayê jiyane, bermahiyan dihundirîne. Em ji ber kêmbûna madeyên pêwîst zehmetî di meşandina xebatên tamîrkirina muzeyê de dikişînin. Niha muze ji bermahiyên DAIŞ’ê tê paqijkirin û her wiha baxçeyê muzeyê jî hatiye paqijkirin.”
DÎROKA WÊ
Muzexane di dema dagirkeriya Osmanî di sala 1861’an de hatiye avakirin. Berê wek sera tê bikaranîn û di 24’ê Cotmeha 1981`an de wek muzexane hat bikaranîn.
Muzexane li navenda bajêr cih digire. Qad bi navê Qada Muzeyê tê naskirin. Muze dabeşî du qatan dibe, her qatek beşekê dihewîne. Beşa yekemîn vedîtinên mîsyonên arkeolojîk û beşa duyemîn bermahiyên Ebasiyan ên dîrokî li Reqayê dihewîne.
Çeteyên DAIŞ’ê muzexane talan û wêran kir û her wiha hemû bermahiyên dîrokî dizîn û peykerên dîrokî şikandin, ji wan tabloyên nîgarkirî, guharên zêrîn, pereyên medenî yên cuda, lembeyên kevn, neqşe û nivîsên ku dîroka wan vedigere serdemên cuda û gelek parçeyên dîrokî yên kevn.
Niha tenê hejmarek ji tabloyên nexşekirî yên ku dîroka wan vedigere sedan salan li muzexaneyê hene…ANHA
Muzexaneya dîrokî tê sererastkirin
