Hemza Sêvo/Qamişlo
Meclisa Cîbicîkar a Kantona Cizîrê têkildarî berdewamkirina êrîşên dagirker li ser herêma Bakur û Rojhilatê Sûriyê li pêşiya Navenda Mihemed Şêxo a Çand û Hunerê daxuyaniyeke bi nivîskî dan. Meclisê ji bo heman mijarê anî ser ziman ku dagirkeriya Tirk bi êrîşên xwe nikare vîn û hêza gelên Bakur û Rojhilatê Sûriyê bişkîne.
Bi armanca şermezarkirina kiryarên dagirkeriya Tirk û êrîşên li ser gel û binesaziya hrêma Bakur û Rojhilatê Sûriyê Meclisa Cîbicîkar îro daxuyaniyek da.
Daxuyanî bi zimanê kurdî û erebî bû, hemû endam û rêveberên desteyên Rêveberiya Xweser tevlî daxuyaniyê bûn û naveroka wê jî wiha bû:
Di destpêka daxuuaniyê de bal hat kişand li ser êrîşên dagirkeriya Tirk yên dawî û berdewamiya van êrişan li ser herêma Bakur û Rojhilatê Sûriyê û wiha hat gotin:“Qirkirina ku dewleta Tirk a dagirker li dijî herêma me ya Bakur û Rojhilatê Sûriyê dimeşîne, balafirên wê şevên înê û şemiyê binesazî, navendên xizmetguzarî û jiyanî yên gundewarên Dêrikê bombebaran kirin. Herwiha Terbesbî, Rimêlan, Çil Axa û vê sibê jî li Eyn Îsayê û dirbêsiyê hatin bombebaran kirin, di encama bombebaranê de saziyên xizmetguzariyê yên ku av, elektrtîk û çandiniyê tevahiya herêmê dabîn dikin ji xizmetê hatin derxistin. Ev kiryarên hovane hemû yasa û peymanên navdewletî binpê dike. Herwiha dagirkeriya Tirk bi riya kiryarên xwe ewlekarî û aramiya herêmê û pirojeya demokratîk dike armanc. ”
Meclisa Cîbicîkar a Kantona Cezîrê di derbarê berxwedana gelên Bakur û Rojhilatê Sûriyê de li dijî êrîşên dagirkeriya Tirk li ser herêmê de wiha got: “ Hikûmeta Erdogan hewl dide Faşîzma xwe weke serkeftinekê li pêşberî raya giştî ya Tirkiyê ya ku di rastiyê de di nava krîzên navxweyî û aborî de ye derbas bike, nîşan bide û wan krîzên hundirîn çareser bike. Ev êrîş û siyasetên dijmirovî wê hêz û îradeya gelê me neçewisîne û bi hemû pêkhateyên xwe ku bi projeya xwe ya demokratîk li hember dagirkerî û terorê ber bi pêş ve biçe, û parastina destkeftiyên wê û pûçkirina plan û siyasetên koçberkirin û guhertina demografîk bişkînin.”
Meclisa Cîbicîkar a Kantona Cezîrê di dawiya daxuyaniya xwe de wiha banga xwe anî ser ziman û got: “Em van êrîşên ku ewlehiya herêmê dike hedef, şermezar dikin û em bang li hemû hêzên çalak ên li Sûriyeyê, civaka navneteweyî û rêxistinên mafên mirovan dikin ku erkên xwe bi cih bînin. Tawanên ku dewleta Tirk dike, sûcên şer yên li dijî mirovahiyê ne û da ku dewleta Tirk a dagirker berdewam neke û terorîzm, destdirêjiya wê rawestîne pêwîste tedbîrên xweparastinê were girtin. Em bang li gelê xwe bi hemû pêkhateyan dikin ku sîstema xweparastinê pêş bixin, li dora saziyên xwe bicivin û destkeftiyên xwe biparêzin.
Herwiha bi yekîtiya pêkhateyên herêmê, hevgirtin û îradeya wan, pîlan û şerên sîstematîk ên tunekirinê têk diçin, em tekez dikin ku wê vîna gelan û projeya demokratîk bi ser bike. ”
