Li Omeryana ku her sal bi şewatên daristanan tê rojevê, dîsa çar roj berê şewat derket û li gundan belav bû. Yek ji van gundan gundê Serêkaniyê bû. Terfa Yildirim a ji gundê Serêkaniyê got: “Ji bo em ji vir derkevin û biçin, vê her sal dikin.”
Li herêma Omeryan a girêdayê Nisêbîn a Mêrdînê sê roj berê qedexeya derketina derve hat îlankirin û piştî vê şewat derket, bi hezaran hektar daristan tune kir. Şewat gihişt heta gundên derdorê û di şertên zehmet de hat temirandin. Yek ji gundên ku şewat gihiştê Serêkaniyê bû. Li gund yek sewalek û baxçeyek nema. Jina bi navê Terfa da zanîn ku li gund tenê çend malbat mane û dixwazin wan jî bidin koçberkirin.
Terfa ya roja bûyerê vegot, diyar kir ku ji dûmana ji lutkeyên çiyan bilind bûye, şewat derketiye û wiha got: “Ji ber ba şewat zêde bû. Ba gurr bû. Me sibehê saet di 9’an de şewat dît û êvarê saet di 4’an d e gihişt gund. Em giriyan, me alîkarî xwest lê kes nehat. Herî dawî kurê min xwe avêt agirkujê. Agirkuj hat. Agirkujê jî av avêt û çû. Bi ava wan agir kêm nebû.”
Terfayê destnîşan kir ku ji ber şewata derdiketiye sewalên wê telef bûne, xaniyê wan zirar dîtiye û got her sal vê yekê dijîn û ji ber şewatê nikarin darekê biçînin û sewalan xwedî bikin.
Terfayê di dawiya axaftina xwe de bertek nîşanî rewşê da û diyar kir ku ji bo wan ji vir derxînin û bidin koçberkirin her sal van deran dişewitînin. Terfayê got ew ji gundê xwe dernakevin.
Ji bo em derkevin her sal dişewitînin
