Li ser bingeha pêşxistina asta zanabûnê ya jinan, Meclisa Jin a Tebqayê li gundewarên rojava û rojhilatê herêmê rêzesemîner da destpêkirin.
Semînera yekemîn li Mala Jinê ya Mensûra bi beşdarbûna bi dehan jinên di nava sazî û meclisan de hate dayîn.
Semîner ji aliyê Berdevka Komîteya Jin a Rêveberiya Sivîl a Demokratîk a herêma Tebqayê Cuheyna Misto û Rêvebera Mala Jinê ya Mensûra Nesra Ebakê ve hate dayîn. Mijara semînerê li ser “Di Netewa Demokratîk de Hevjiyana Azad û Zayendperestî” bû.
Cuheyana Misto di semînerê de axivî û got, “Di encamên civaka baviksalarî, jin hatibû paşguh kirin û kolekirin, her wiha li dijî jinan qirkirina çandî pêk anîn.”
Cuheyna anî ziman ku “Civaka ku jin tê de azad nebe, ew civak ne azad e.”
Rêvebera Mala Jinê ya Mensûra Nesra Ebakê, li ser mijara zayindperestî, serweriya hişmendiya zilamê serdest, jin wê çawa li hember vê zihniyetê bisekine axivî.
Nesra Ebakê wiha got, “Malbat tova civak, dewlet û zilam e. Zilam çi bav be, çi bira an xwe xwekî serwerê malbatê dibîne, biryara yek û ya dawî ya wî ye ku li ser jinan ferz dikin. Bi her awayan mudaxele li jiyana jinan dikin.”
Di dawiya semînerê de beşdaran behsa pirsgirêkên ku tên serê wan kirin.
Semîner di nava hefteyekê de li gundewarên Tebqayê wê werin dayîn…ANHA
Meclisa Jin a Tebqayê rêze semîner da destpêkirin
