Nûnerê Partiya Sûriya Pêşerojê yê li Şehbayê Eladîn Xalid destpêkirina diyaloga MSD’ê bi rêjîma Sûriyê re erênî nirxand û diyar kir ku divê êdî şer li Sûriyê raweste û çareseriyeke aştiyane pêk were. Xalid wiha got, “Divê hemû aliyên Sûriyê li ser maseyê rûnên û çareseriyê pêş bixin.”
Nûnerê Partiya Sûriya Pêşerojê yê li Şehbayê Eladîn Xalid destpêkirina diyaloga siyasî ya bi rêjîma Sûriyê re erênî nirxand û diyar kir ku divê hemû aliyên Sûriyê li ser heman maseyê bicivin, çareseriyê bi diyalogê pêk bînin.
Di derbarê hevdîtinên Meclisa Sûriya Demokratîk (MSD) û rêjîma Sûriyê de, nûnerê herêma Şehbayê ya Partiya Pêşerojê ya Sûriyê parêzer Eladîn Xalid axivî û destnîşan kir ku beriya wê jî gelek serdan û parvekirina nêrînan pêk hatine.
Xalid diyar kir ku wek Partiya Pêşerojê ya Sûriyê ji dema hatiye damezirandin ve ew banga diyaloga aştiyane dikin wiha got: “Cihê terorê li ser axa Sûriyê tune ye û divê şer jî di Sûriyê de bi dawî bibe.”
Xalid da zanîn ku helwesta wan di aliyê çareseriya siyasî û aştiyane de ye û wiha dewam kir: “Ji ber şer Sûriye hilweşiya û welatiyên wê şerpeze bûn. Em amade ne bi hemû aliyên Sûriyê re bicivin û hevgirtina hemû pêkhateyên Sûriyê biparêzin.”
Xalid destnîşan kir ku tecrubeya Rêveberiya Xweseriya Demokratîk li Bakurê Sûriyê mînaka demokrasî û piralîbûnê ye û divê hemû aliyên Sûriyê li ser heman maseyê bicivin, nakokiyên di navbera xwe de bi rêbazên aştiyane çareser bikin.
Girêdayî hevdîtinên MSD’ê li Şamê Xalid wiha got: “Ev civîn wê kevirkoşeya danûstandinan bi cih bikin û wê komîteyên ji bo danûstandinan ava bikin.”
Nûnerê herêma Şehbayê ya Partiya Pêşerojê ya Sûriyê Eladîn Xalid di dawiya axaftina xwe de hevdîtinên MSD’ê bi hikumeta Sûriyê re erênî dît û hêvî kir ku çareseriyeke siyasî û aştiyane pêk were û Sûriyeke demokratîk, piralî û nenavendî were avakirin…ANHA
