Cîgirê hevseroketiya Meclisa Rêveber a Rêveberiya Xweseriya Demokratîk a Herêma Bakur û Rojhilatê Sûriyeyê destnîşan kir ku dorpêça hikumeta Şamê ya li ser kantona Efrîn û Şehbayê û taxên Şêxmeqsûd û Eşrefiyê beşeke dorpêça giştî ya li ser herêma Bakur û Rojhilatê Sûriyeyê ye.
Hikumeta Şamê dorpêça xwe ya li ser kantona Efrîn û Şehbayê û taxên Şêxmeqsûd û Eşrefiyê yên Helebê didomîne, di encamê de rewşa jiyanê ya herêmê paş ket û kehrebe ji 23’yê Mijdara borî de qut bûye.
Her wiha di encama dorpêçê de û ji ber tunebûna sotemeniyê û rawestîna veguhastina erebeyan li kantona Efrîn û Şehbayê, dibistan hatin girtin û pê re bi deh hezaran şagirtên hemû qonaxan ji perwerdehiyê bêpar man.
Cîgirê hevseroketiya Meclisa Rêveber a Rêveberiya Xweseriya Demokratîk a herêma Bakur û Rojhilatê Sûriyeyê Hemdan El Ebid destnîşan kir ku dorpêça li ser kantona Efrîn û Şehbayê û taxên Şêxmeqsûd û Eşrefiyê beşeke siyaseta guhartina demografîiyê ye û ev yek daxwazên hikumeta Şamê û dewleta Tirk a dagirker e da ku welatiyan neçar bikin ku serî bitewînin û got: “Ev dorpêç beşeke dorpêça giştî ya li ser herêmên Rêveberiya Xweser e.”
El Ebid der barê deriyê Til Koçer ê di navbera herêmên Rêveberiya Xweser û Iraqê de wiha axivî: “Me dît ku hikumeta Şamê û bi vetoya Rûsya û Çînê rê li ber derbaskirina alîkariyên mirovî bi rêya deriyên Bakur û Rojhilatê Sûriyeyê girt û nehişt ew derbasî herêmê bibin û bigihîjin şêniyên herêmê û koçberên tê de.”
El Ebid da zanîn ku siyaseta hikumeta Şamê ya çareseriya leşkerî li şûna çareseriya siyasî ji destpêka kirîza Sûriyeyê de heman siyaset e, armanca wê jî ew e ku gelê Sûriyeyê vegerîne beriya sala 2011’an.
El Ebid helwesta Rêveberiya Xweser ku girîngiyê dide vekirina deriyan û dûrxistina dozên mirovî ji siyasetê û pêkanîna diyalogê li şûna rêbazên leşkerî.
El Ebid destnîşan kir ku Rêveberiya Xweser ji roja yekemîn de bi rêya navberkaran peyam ji bo hikumeta Şamê û ji bo Neteweyên Yekbûyî (NY) şandin da ku ev dorpêça li ser tevahiya herêmên Bakur û Rojhilatê Sûriyeyê bi dawî bibe û derî bên vekirin bi taybetî deriyê Til Koçer û noqteyên ewlekariyê yên di navbera herdu aliyan de bên rakirin.
El Ebid di dawiyê de got: “Mixabin aliyek heye li hember alîkariyên ku ji bo gelê Sûriyeyê û koçberên kampan hatine şandin, disekine û rê nade wan. Em bang li NY’ê û rêxistinên mirovî dikin ku li hember deverên dorpêçkirî xwedî li erkên xwe derkevin.”