Kiryarên dagirkeriya Tirk û çeteyên wê yên li dijî jinên kurd li Efrînê dewam dikin, herî dawiyê li ser destê çeteyan 2 jinên kurd hatin kuştin. Derbarê mijarê de Koordînasyona Kongira Star li Şehbayê Ferîde Îbo wiha got: “Di Efrînê de jinên Kurd dibin qurbaniya hişmendiya zilam”.
Vîndar Roj/ Şehba
Dagirkeriya Tirk û çateyên girêdayî wê di hundir Efrînê de tavahî cureyên binpêkirinan li ser gelê resen didin meşandin, êdî gel ji hebûn û kiryarên wan ber bi rewşeke xeter ve diçe. Gel bi şev û roj di nava tirsekê de jiyan dike. Kîjan kêlî dest bavêjin mirov û winda bikin ne diyar e. Hêjayî gotinê ye ku heyanî niha di heps û zîndanên çeteyan de bi hezaran gelê Efrînê ji jin û mêran hene û heyanî niha jî çarenûsa wan ne diyar e. Herî dawî di hundir Efrînê de 2 jin hatine kuştin. Yek ji ber sedema Mîrasê bi ser destê birayê hevjînê xwe hat kuştin, ya din jî li ser riya Izazê bi sedemeke ne diyar hatiye kuştin.
Têkildarî sûcên kuştina jinan di hundir Efrînê de endama Koordînasyona Kongira Star ya Efrîn û Şehbayê Ferîda Îbo ji rojnameya me re axivî.
‘Hovîtiya dagirkeriya Tikr û çeteyên wê bê sînor e’
Ferîda Îbo di destpêka axaftina xwe de diyar kir ku nêzî 6 salan e kiryarên dewleta Tirk a dagirker û çeteyên wê li dijî gelê Efrînê berdewam e û wiha got: “Kiryarên dagirkeriya Tirk û komên çeteyên giryêdayî wê bi heman hovîtiyê li ser tavahî gelê Kurd him di Efrînê de û him jî li ser herêma Şehbayê bê navber tê meşandin. Her roj Şehbay ji aliyê faşîzma Tirkiyê ve tê hedef girtin û di encam de gelek welatç birîndar û şehîd dibin. Her wiha di Efrînê de hemû cûreyên binpêkirin û talankirinê li ser gelê Kurd û bi taybet li ser jinê tên meşandin, bi hezaran sûcên kuştinê hatine pêk anîn. Ev rewş ji bo gelê wê derê rewşa herî xerbnak û bi êşe. Kîjan kêlî kîjan deqe werin dest bavêjin jin û zarokan ne diyar e. Di heman demê de ji tirsa re gel li hemberî wan jiyan dike, bêdeng û bê zar dimînin.”
Herî dawî 2 jin li Efrînê hatin kuştin
Ferîda da zanîn ku herî dawî bi wehşiyetekê 2 sûcên kuştina jinan di Efrînê de hatin pêk anîn û wiha domand: “Efrînê di bin talankirin, destdirêjî, bûyerên Kuştin û şerefê, revandin û tecawîzkirinê de fetisiye. Bê exlaqiya komên çeteyan û ya dagirkeriya Tirk gihîştiye lûtkeyê. Di 10 mehê de Li taxa Eşrefiyê ya Efrînê jinek ku dayîka 4 zaroka ye, li ser destê birayê hevjînê xwe bi sedema mîrasê hatiye kuştin. Ew zilamê ku jin kuştiye di nava komên çeteyan de cih digire, ji ber wê xwe radestî Polîsa Medenî kir û bi hinceta ku `Şerefa xwe paqij kiriye` piştrî hefteyekê serbest hate berdan.”
Ferîda wiha axaftina xwe domand: “Di Efrînê de jin dibin qurbaniya zihniyet û bikaranînên zilam. Di heman çarçûveyê de li ser riya Efrîn û Ezazê nêzî gundê Kefir Cenê yê girêdayî navçeya Şera jinek kuştî hat dîtin. Heyanî vê kêliyê ji aliyê kê de û ji bo çi ew jin hatiye kuştin ne diyar e.”
Endamê Koordînasyona Kongira Star Ferîda Îbo tekez kir ku ew ji bo jinên Efrînê û tavahî jinên Kurd têdikoşin û axaftina xwe wiha bi dawî kir: “Em weke tevgera jinên azad ev kuştin û bûyerên ku derheqê jinê de tên kirin tu carî qebûl nakin û em ê hewil bidin ku dengê van jinan û van sûcan ji dinyayê re ragihînin da ku em çareseriyekê li hember bûyera kuştina jinê bibînin. Tavahî xebat û têkoşîna me li ser vê esasê tên meşandin û em bawerin wê di dawiyê de dengê rastiyê bigihîne cîhanê.”
