Rêxistina Efûya Navnetewî raporek li ser tundûtîjiya ji aliyê hêzên ewlehiyê yên Îranê li dijî xwepêşanderan tê kirin weşand û diyar kir ku ji bo çavtirsandin û bidawîkirina Şoreşa ‘Jin Jiyan Azadî’ serî li destdirêjiyên zayendî daye.
Rêxistina Efûya Navnetewî (Amnesty International) li ser tundûtîjiya ji aliyê hêzên ewlehiyê yên Îranê li dijî xwepêşanderan tê kirin, raporek weşand. Amnesty International diyar kir ku hêzên ewlehiyê yên Îranê ji bo çavtirsandin û bidawîkirina Şoreşa ‘Jin Jiyan Azadî’ serî li destdirêjiyên zayendî daye.
Di rapora ku 6’ê Kanûnê de hatiye weşandin de hate eşkerekirin ku ji bo tepisandin, tirsandin û fetisandina xwepêşanderan, herwiha bidawîkirina Şoreşa ‘Jin Jiyan Azadî’ hêzên ewlehiyê yên Îranê destdirêjiya zayendî li xwepêşanderên jin, zarok û mêran kirine.
Rapora Amnesty International ku ji 120 rûpelan pêk tê, bi sernavê “Bi Dirindane Destdirêjiya Zayendî li Min Kirin’ ku 45 kesên ji vê destdirêjiyê ji destê hêzên ewlehiyê yên Îranê rizgar bûne weşand. Ji van 45 kesan 26 mêr, 16 jin û 7 jî zarokin. Di raporê de serhatiyên van 45 kesan hatine belgekirin ku hêzên ewlehiyê yên Îranê destdirêjiya zayendî li wan kirine.
Herwisa ji 45 rizgarbûyên ku rewşa wan di raporê de hatiye belgekirin, 16 ji wan rastî tecawizê hatine ku 6 jin, 7 mêr, zaroka keçek ya 14 salî û 2 xortên 16 û 17 salî bûn. Di raporê de hate eşkerekirin ku 6 ji wan jî ku 4 jin û 2 mêr, rastî destdirêjiya zayendî komî hatine.