Ji bo Silêman Ehmed ê ji aliyê PDK’ê ve hate revandin û 42 roj in agahî jê nayê wergirtin 212 kesayet û saziyên li Başûrê Kurdistanê bang kirin.
Edîtorê beşa Erebî ya ajansa Rojnewsê Silêman Ehmed roja 1’ê Cotmehê ji bo serdanê çûbû cem malbata xwe ya li Taxa Şêx Meqsud a Helebê. Silêman roja 25’ê Cotmehê dema xwest di ser deriyê Pêş Xabûr (Sêmalka) re derbasî Başûr bibe, ji aliyê hêzên PDK’ê ve hat revandin û ev 42 rojin agahî jê nayê girtin.
Ji bo azadiya rojnamevan Silêman Ehmed ji 212 kesayet, rojnamevan, rêxistin, parlamenterên berê, çalakvan, parêzer û mamosteyên zanîngehê banga lezgîn hate kirin ku di demeke zû de Silêman Ehmed bê berdan.
Banga ji bo raya giştî hatî weşandin, wiha ye:
Ji bo raya giştî:
“Zêdetirî meheke rojnamevan Silêman Ehmed ku edîtorê beşa erebî ya ajansa Rojnewsê ye, ji aliyê asayîşa Dihokê ve hatiye revandin û winda ye.
Di nava meha borî de tevî hemû hewldanên ji bo azadiya rojnamevan ên ajansa Rojnews, Kompanyaya Çetir, 10 caran tîma parêzerên Silêman Ehmed hewldan dosyaya Silêman bibînin û raste rast Silêman bibînin. Lê asayîşa Dihokê rê neda.
Heya niha rê nehatiye dayîn ku ti parêzer wekaleta Silêman Ehmed bigire û li ser dosyaya wî kar bikin. Ev jî binpêkirinek berçave. Em weke rojnamevan, mamosta, çalakvan, parêzer, kesayet û azadîxwazan dibêjin, ya ku li beramberî rojnamevan Silêman tê kirin, senaryoyek dubare ya desthilatê ye û dixwaze mîna Şêrwan Şêrwanî û girtiyên din yên Behdînanê, Silêman jî bi tometên bê bingeh ceza bike û bixe girtîgehê.
Ji bo vê, erkê hemû rojnamevan, azadîxwaz, rêxistinên navxweyî û navnetewî yên mafên mirovan ew e ku vê danûstandina desthilatê ya li beramberî rojnamevanan qebûl nekin. Ji ber ku ev yek di dema pêş de Herêma Kurdistanê ber bi pêşerojek tarî ve dibe.
Silêman Ehmed bê suce, li ser karê xwe yê rojnamevaniyê hatiye revandin û windakirin. Ewlekarî û jiyana Silêman di berpirsyartiya asayîşa Dihok û desthilatdarên Herêma Kurdistanê deye. Ji bo vê pêwîste demek ji ya din zûtir Silêman Ehmed were berdan.
