Komîteya Xizmetguzarî û şaredariyan di bin çavdêriya Meclisa Sivîl a Dêrazorê de bi armanca rakirina sergoyê ji rêyên gundewarên rojhilat û rojavayê Dêrazorê, dest bi pêngava paqijiyê ya bi navê “Hemleya Firatê” kir.
Alavên paqijyê dest bi rakirina sergo û bermahiyên xirakirinê ku ev 7 sal e hatiye paşguhkirin, kir. Ji ber vê yekê rê hatin girtin, şêniyên herêmê jî ji ber vê yekê gelek zehmetiyan dibînin û nexweşî belav dibin.
Meclisa Sivîl a Dêrazorê û komîteyên xizmetguzariyê piştî civîna xwe lidarxistin bi awayekî lez dest bi amadekariyên projeya “Hemleya Firatê” kir.
Piştî civînê projeya paqijkirinê li gundewarên rojava û rojhilatê Dêrazorê dest pê kir. 92 karker tev li pêngavê bûne. Pêngav ji gundê El-Cenîna yê gundewarên rojavayê bajêr destpê kir û wê heta herêma El-Cezrat berdewam bike.
Meclisa Sivîl a Dêrazorê cihek li çolistanê diyar kir da ku sergo lê were komkirin. Li wê derê kortek bi kûrahiya 15 metreyan hate kolandin da ku çop têde were veşartin û ji bo ku nexweşî jî belav nebin.
Her wiha meclisê 197 selikên çopê û 47 erebeyên biçûk ji bo komkirina çopê diyar kirin.
Yek ji rêveberên Komîteya Xizmetguzariyê ya Meclisa Sivîl a Dêrazorê û berpirsê projeya paqijkirinê Yasir El-Ewad diyar kir ku ev çend roj e wan dest bi paqijkirinê kiriye û wê 5 mehan berdewam bike.
Hate zanîn ku 282 hezar dolar ji bo vê projeyê hatiye veqetandin.
Piştî ku gundewarên rojhilat û rojavayê Dêrazorê ji aliyê şervanên QSD`ê ve ji çeteyên DAIŞ`ê hatin rizgarkirin, Meclisa Sivîl a Dêrazorê bi hemû hêza xwe xizmeta şêniyên herêmê dike…ANHA
Paqijiya li gundewarên Dêrazorê didome
