Şîniyên Qamişlo 45’emîn salvegera damezrandina PKK’ê pîroz kirin

Hemza Sêvo/ Qamişlo
Bi boneya 45’emîn salvegera damezrandina Partiya Karkerên Kurdistanê(PKK) çalakiyek pîrozbahiyê li Baxçeyê Azadiyê yê bajarê Qamişlo hat li dar xistin û di çalakiyê de bi hezaran şîniyên Kantona Qamişlo hazirbûn.
Bi boneya pîrozkirina salvegera 45’emîn a damezrandina PKK’ê, Meclisa Qamişlo Baxçeyê Azadiyê bi amadebûna hemû Saziyên Rêveberiya Xweser, Tevgera Civaka Demokratîk û hezaran şîniyên kantona Qamişlo vekir û çalakiyek girseyî li dar xist.
Di serî de hemû kesên beşdar xuleyeke bêdengiyê li ser giyanê şehîdan rawestiyan. Herwiha pîrozbahiya salvegera damezrandina PKK’ê bi coşeke mezin dest pê kir û li ser navê Saziya Malbatên Şehîdan, Necah Gulo di derbarê salvegera damezrandina PKK‘ê de wiha got: “PKK’ê di şert û mercên zehmet de, di demekê de ku gelê kurd dihat qirkirin, hat damezrandin. Jê û pê de gelê kurd ji tarîtiyê derket û welat û mafê xwe nas kir, di heman demê de bi fikrên Rêber Apo û PKK’ê têkoşîn kir. ”
Piştre jî li ser navê Akadimiya Civaka Demokratîk Mûsa Xelîl wiha anî ser ziman: “45 sal li ser damezrandina PKK’ê derbas dibin, em bi rêz û hurmet bibîr tînin, herwiha vê boneyê li şehîdên xwe, lehengên Gerîla, Rêber Apo, QSD û gelên Bakur û Rojhilatê Sûriyê pîroz dikin. Rêber Apo bi fikr û felsefeya xwe û bi PKK’ê şoreşeke mezin da destpêkirin. Ev şoreş jî ne mîna şoreşên kurdan yên berya xwe bûn ku carekê dişkestin û şoreşa xwe bi dawî dikirin, lê belê her cara ku Gerîlayek ji PKK’ê şeheîd dibû, Rêber Apo bi xwîna wî/ wê sûnd dixwar û gavên mezintir davêtin pêş. PKK’ê bi vê têkoşîn û berxwedanê şoreşa xwe berdewam kir û xwe isbat kir. “
Di pêşveçûna çalakiya pîrozbahiya damezrandina PKK’ê de Baxçeyê Azadiyê bi tilîliyên dayikên şehîdan û jinan geş bû, wêneyên Rêber Apo û ala PKK’ê, herwiha nîşanên serkeftinê li jor bûn.
Herwiha çalakiyên hunerî jî hatin pêşkêşkirin, Koma Şehîd Welat a dîlanê, Koma Botan û Sakîne yên muzîkê sitranên şoreşgerî û govendên foloklorî pêşkêş kirin.
Di heman demê de jî helbestên bi zimanê kurdî û Erebî yên li ser Rêber Apo û PKK’ê ji aliyê helbestvan Ebdullah Xelîl û Gulnaz Yûsiv ve hatin xwendin.
Li aliyekî din jî çend stranên şoreşgerî û netewî bi zimanê kurdî û erebî ji aliyê hunermend Nisrîn Botan, Hesen Dêrikî û Semîr Elerebî, hatin gotin.
Şahiya bîrozbahiyê bi govend û dîlanan hat bidawîkirin.
Hêjayî gotinê ye ku bi vê boneyê şahî li tevahiya Bakur û Rojhilatê Sûriyê, çiyayê Kurdistanê û her welatekî ku bêhna azadiyê kiribe hatin lidarxistin.