Êrîşên Îsraîlê yên li dijî Xezayê ku 7’ê Cotmehê dest pê kirin, 38 roj li pey xwe hişt. Di êrîşên ku heta niha berdewamin, nêzî 5 hezar zarok, 3 hezar jin jî di nav de, zêdeyî 11 hezar Filistinî hatine kuştin û herî kêm 30 hezar kes jî birîndar bûne.
Di 7’ê Cotmehê de artêşa Îsraîlê li dijî Xezayê êrîşeke hewayî û bejahî ya berfireh da destpêkirin. Li gorî amarên fermî yên Wezareta Tenduristiyê ya Xezayê di êrişên ku heta niha dewam dikin zêdetirî 11 hezar Filestînî hatine kuştin û hijmara birîndaran jî 30 hezar derbas kiriye.
Di êrîşên Israîlê yên li dijî Xeze tevahiya nexweşxaniyan jî hatin hedfgirtin, balafirên şer yên Îsaraîl bi awayekî domdar nexweşxane , kampên kuçberan û her devrê li Xezayê bombaran dike.
Li aliyekî din di 9 Mijdarê de Rêxistina Mirovî ya Neteweyên Yekbûyî (UNRWA) ji ber berdewamkirina şerê li Xezayê hişyariya rûdana karesata mirovî da. Rêxistinê bi daxuyaniyekê destnîşan kir ku ji dema destpêkirina şerê Hemas-Îsraîlê ve 100 karmendên wan jiyana xwe ji dest dane. Di daxuyaniyê de hat gotin ku ev hejmara herî zêde ye ku endamên wan di şerekî de jiyana xwe ji dest didin.
UNRWA’yê da zanîn li Xezayê rewşa mirovî her ku diçe xirabtir dibe û pêwîste di zûtirîn dem de alîkariyên tendirustî bigihînin nexweşxaneyan. Serokê UNRWA′yê Phîlîppe Lazzarînî di daxuyaniya xwe ya li ser hesaba X de diyar kir ku di nava mehekê de zêdetirî 100 xebatkarên UNRWA’yê hatine kuştin.
Lazzarînî diyar kir ku ev dayik û bav, mamosta, hemşîre, bijîjk, karmendên alîkariyê ne û got: “UNRWA şîn digre, Filistînî şîn digrin, Îsraîlî şîn digrin. Ji bo dawî li vê trajediyê bînin pêwîstiya me bi agirbesteke mirovî ya bilez heye.”
Di heman çarçoveyê de Heyva Sor a Filistînê di 12 Mijdarê de ragihand ku Nexweşxaneya El Qudis a li Xezayê ji xizmetê derket, her wiha berdevkê tenduristiyê anî ziman ku li Nexweşxaneya Şîfa cenaze li ser hev kom bûne.
Berdevkê Wezareta Tenduristiyê ya Xezayê Eşref El Qudre diyar kir ku Nexweşxaneya Şîfa ya li bakurê Xezayê nikare tu xizetmguzriyekê pêşkêş bike, ji ber ku hemû derfetên neman, kehrebe qut bû û ji hêla tankên Îsraîlê ve hate dorpêşkirin.
El Qudre diyar kir ku rewşa li derdora nexweşxaneyê′qada şer e′ û got rewşa nexweş dijîn nayê wesifkirin û cenaze hem li hundir hem jî li derveyê nexweşxaneyê kom bûne û kesek tune wan veşêre.