Li herêma Siweyda ya başûrê Sûriyê rêze êrîşên xwekujî pêk hatin û di encamê de bêtirî 50 welatiyan jiyana xwe ji dest da, bêtirî 50 welatiyên din jî birîndar bûn.
Çeteyên DAIŞ’ê rêze êrîşên xwekujî li dijî welatiyên bajarê Siweyda yê başûrê Sûriyê ku ji pêkhateya durzî pêk tê, pêk anîn. 3 çeteyên xwekuj xwe di nava welatiyên bajêr de li bazara sebzeyan, çerxerêya El-Meşneqa û çerxerêya El-Nicmê teqand. Di encamê de herî kêm 50 welatiyan jiyana xwe ji dest da û 50 welatiyên din jî birîndar bûn.
Di dema êrîşên xwekujiyê de li hin deverên din ên bajêr bombe hatin teqandin. Bi taybet piştî ku hêzên rêjîma Sûriyê li gundewarên bakurê rojhilatê Siweyda êrîşên dijwar li dijî komên çete pêk anîn.
Li gorî agahiyên hatine bidestxistin, çeteyên DAIŞ’ê serweriya xwe li ser gundên Doma, El-Şebkî, El-Şirêhî, Til El-Besîr ên bakurê rojhilatê Siweyda ava kirin û êrîşên xwe bi ser gundên El-Metûnê û Tîma ve birin.
Hêzên rêjîmê û hevkarên xwe serweriya giştî bajarê Siweyda ji bilî aliyekî gundewarên wê dikin. Dezgehên çapemeniyê yên girêdayî rêjîma Sûriyê ragihand ku balafirên şer ên Sûriyê kozikên çeteyan li bakurê rojhilatê bajêr bombebaran kirine û hêzên rêjîmê hewldana çeteyan a êrîşa li dijî gundên Tîma û El-Metûnê şikandin.
Posta çûyî
Posta tê