Hemza Sêvo/ Qamişlo
Wênesaz Hukmet Ibrahîm di 50’î saliya temenê xwe de li hunera zaroktiya xwe vedigere. Ew bi şêwazên xwe yên cuda û balkêş di 11 mehan de 150’î tablo saz kirin. Girêdayî vê yekê Hukmet Ibrahîm anî ziman ku wênesazî nasnameya civakê ye û hezkirina min ji vê hunerê re ji qonaxa zaroktiyê ve ye. Lê ji ber derfetên aborî yên kêm ez jê dûr mam.
Hunera wênesaziyê yek ji hunerên girêdayî hest, çav û ramanên kesê wênesaz e. Hin wênesaz ramanên cîhana xwe ya taybet li ser tabloyan xêz dikin û hin wênesaz rastiya hawîrdora xwe û tişta ku çavên dibîne bi şêwazê xwe xêz dikin. Li gor rêgezên wênesaziyê wênesaz kar dike û afrîneriya wî bi riya berhemên wî ve têne diyarkirin. Gelê kurd xwe ji vê hunerê bêpar nehiştiye. Wênesazên kurd jî bi tiliyên destê xwe yên efsûnî û tabloyên xwe yên objektîv û balkêş mohra xwe li hunera wênesaziyê dane. Yek ji van wênesazan jî Hukmet Ibrahîm e.
Kurtejiyan û xwendina wênesaz Hukmet Ibrahîm
Wênesaz Ibrahîm girêdayî xwendin û jiyana xwe wiha anî ziman:”Ez wênesaz Hukmet Ibrahîm im, di sala 1965 de li gundê Tenûriyê ji dayîk bûme û min xwendina xwe ya seretayî li dibistana Tenûrî temam kir. Herwiha min qonaxa navîn li Qamişlo dewam kir. Piştre jî min xwendina amadeyî ya pîşesaziyê li her li Qamişlo xwend. Di sala 1986’an de jî min bawernameya amadeyî wergirt û ez çûm bajarê Hesekê da ku dest bi xwendina xwe ya li peymangehê bikim. Min di heman salê de dest bi xwendina peymangeha pîşesaziyê kir û di sal 1988’an de jî derçûm. Ez di dema niha de weke karmendekî li Sitasiyona Siwêdiyê ya bajarê Dêrikê, kar dikim. Ez ji sala 1991’ê ve vî karî dikim. Ez tenê bi xwendina xwe ve mijûl bûm heta ku min xwendin bi dawî kir û derbasî karê piratîkî bûm. Ez di dema niha de karê wênesaziyê dikim, herwiha li aliyekî din jî ez helbestan jî dinivîsînim û heta niha min nêzî 300 helbestî nivîsandiye. Ez ji qonaxa xwendinê ya navîn ve helbestan bi zimanê erebî dinivîsînim. ” 
Mijarên wêneyên wî xwedî wate ne.
Wênesaz Hukmet Ibrahîm di derbarê mijarên tabloyên xwe de wiha got:”Wênesazî ew hunera ku raman, nêrîn û xeyalên wênesaz vedbêje ye. Herwiha hunera wênesaziyê weke nasnameya civakê tê hesibandin. Li gor min wênesazî wisa ye, ez weke wênesaz li Rojavayê Kurdistanê piraniya mijarên tabloyên min li ser gelê kurd e. Min gelek tabloyên xwe li ser mijarên girêdayî civaka xwe çêkirine. Weke xwezaya filoklora kurdî, min wêne ji rengê jiyana kurdan bi şêweyekî hunerî yê cuda saz kirine. Weke çêkirina danûkan, hêrtina ard, jinê, yekîtiya kurdan, dayika kurd, dîlana kurdî û hwd… Herwiha Ehmedê Xanî jî di bala min de bû, lewra min ji destana Mem û Zîn, tabloyeke hunerî çêkir. Li aliyekî din jî min xwezaya Kurdistanê bi çiya, tembûr, deşt, rûbar, çem, zinar û çiyayên wê ve di tabloyekê de saz kirine. Herwiha jî min li ser bingeha metelok û gotinên pêşiyan yên civaka kurdî hin wêne saz kirine. Weke gotina( Giya di bin keviran de namîne), min ji vê gotinê tabloyeke hunerî ya balkêş çêkir. Ev tablo teşeyê kevirekî vedihewîne û di nav kevir de jî şaxa dara zeytûnê jî heye. Ev tê wateya ku warê zeytûnan ango wê rojekî Efrîn werê zeytûnan were rizgarkirin û vegere ji xwediyên xwe re.
Di demeke kurt de 150 tabloyên cuda û balkêş afrandin.
Hukmet têkildarî berhemdayîna hunerî û tabloyên xwe, wiha axivî:”Sala bûrî bû ku min dest bi karê wênesaziyê kir. Min bi şêwêyê xwe yê cuda di 11 mehan de 150 tablo saz kirin. Ez wêneyên xwe bi qûm, kevir, nihas, qehwe, qirşikan çêdikim. Herwiha jî li ser dep jî bi riya rengê avî û şelemonê tabloyan saz dikim. Ev yek piştî ku min xwe perwerde kir, li cem min çêbû. Min êdî rojane ji seat 6’ê êvarî heta seat 12’ê şevê kar dikir. Min wiha berdewam kir heta ku 150’î tablo hatine amadekirin. Piştre min pêşangehek bi navê Nameya Newrozê di 16’ê Adara îsal de li Navenda Çand û Hunerê ya Mihemed Şêxo li dar xist. Min piraniya tabloyên xwe li ser xemgînî, şadî, serhidan, azar, destan û filklora kurdan çêkirine. Ji ber ku Cejina Newrozê ji bo me kurdan roja xweşî, xemgînî û serkeftinê ye, min pêşangeha xwe kir nameya Newrozê. Min xwest ku bi riya vê pêşangehê, nameya xwe bighînim civakê, taybet gelê kurd.
Destekdayîna malbatê, rê li ber afrîneriya wî vekir
Wênesaz Hukmet Ibrahîm di derbarê destekdayîna malbata wî ji bo pêşxistina asta hunera wênesazyê li cem wî wiha destnîşan kir: ” Heskirina min ji hunera wênesaziyê ji zaroktiyê ve destpêkir, di dema xwendina min a seretayî û navîn de jî her berdewambû. Wênesazî ji wê demê de bala min dikşand. Lê min xwe di vî warî de perwerde nedikir û min guh nedida vê hunerê. Yek ji sedemên ku ez ewqasî ji wênesaziyê dûr mam, derfeta aborî ya kêm bû. Min di destpêka 2022 de ji nû ve dest bi karê wênesaziyê kir. Ew jî bi saya keça birayê min, Îman Ibrahîm û hevjînê wê bû. Destpêkê wê ev piroje ji min re pêşinyar kir, min got ez dikarim kar bikim, lê derfeta min ya aborî bi min re ne alîkar e. Wê û hevjînê xwe di vî warî de destek dane min, êdî rê li pêşiya xebata min ya hunerî vebû. Min pêlekê karê wênesaziyê kir û niha jî ez ji ber derfeta xwe ya aborî karê wênesaziyê nakim, ji ber buhabûna alavên ku bi riya wê wêneyan xêzdikim. “