Hemza Sêvo/ Qamişlo
Pêşangeha Şehîdî Herekol a pirtûkan bi silogana “Xwendin Ronahî ye” û bi amedebûna rewşenbîr, nivîskar, saziyên Rêveberiya Xweser û bi beşdarbûna weşanxaneyên heremî û navnetewî hate destpêkirin.
Desteya Çandê a bakur û rojhilatê Sûriyê bi hevkariya Desteya Çandê ya Herêma Cizîrê ji bo pêşxistina çanda xwendin, lêhûrbûn û parastina çandî û wêjeyî, îro Pêşangeha Şehîd Herekol a 7’emîn bi duruşmeya ‘Xwendin Ronahî ye’ li hola Zana ya bajarê Qamişlo da destpêkirin.
Herwiha 140 hezar pirtûk ji 60 weşanxane û saziyên cuda yên derve û Bakur û Rojhilatê Sûriyê di pêşangehê de hatin pêşandan.
Pirtûkên ku di pêşangehê de hatine pêşandan xwedî mijarên cûrbecûr in; weke pirtûkên siyasî, çandî, dîrokî, civakî, leşkerî, olî, felsefeyî û hwd…
Ev pirtûk jî bi zimanên Kurdî (Kurmancî, Soranî û Zazakî), Erebî, Farsî, Tirkî, Îngilîzî û Fransî ne. Herwiha hin pirtûk jî hatine wergerandin.
Deriyê pêşangehê ji bo herkesî vekiriye û ji seat 10’ê sibehê heya 8’ê êvarî berdewam dike û bi vî rengî pirograma pêşangehê heya 31’ê Cotmehê wê bi rê ve biçe.
Berî ku ev pêşangeh were destpêkirin hemû kesên beşdar xuleyek rêzgirtinê li ser giyanê şehîdan rawestiyan. Herwiha endama komîteya Amadekar Ronahî Hesen gotina destpêkê kir û wiha axivî: ” Destpêkê em sipasiya malbata Şehîd Herekol dikin ku di vê pêşangehê de beşdar bûn û herwiha beşdarbûna rewşenbîr, nivîskar û saziyên Rêvberiya Xweser cihê şanaziyê ye. Em weke Desteya Çandê ya Bakur û Rojhilatê Sûriyê bi hemû hêza xwe ji bo berdewamkirina vekirina vê pêşangehê kar dikin. Dema vekirina pêşangehê berî niha hatibû destnîşankirin, lê ji ber êrîşên dewleta Tirk yên 4’ê Cotmehê hat taloqkirin. Em îro bi hemû vîn û îsrara xwe, di vê rewşa zehmet de dest bi pêşangehê dikin. Ev yek jî bi saya şehîdên me yên ku xwîna xwe ji bo parastina me rijandine. Em soz didin şehîdên xwe ku me ê, hertim ji bo pêşxistin û parastina çand û zimanê xwe kar û xebatê bikin. Di heman demê de jî em ê, her tim bibin destek ji hemû nivîskar, rewşenbîr û weşanxabeyên xwe re.
Herweha li ser navê Hevsengiya Wêjeyê Besam Xelo wiha axivî: “Em 7emîn pêşangeha Şehîd Herekol di şexsê Şehîd Herekol de bibîr tînin û li wî û tevahiya Şehîdan, gelê Bakur û Rojhilatê Sûriyê pîroz dikin. Şoreşa Rojava şoreşeke wêjeyî li Rojava afirand, bi pirtûk û berhemên xwe yên wêjeyî bandor li hemû cîhanê kir û bû milkê hemû kesî. Ev pêşketina ku di warê çandî, fikrî û wêjeyî de çêbûye bi saya Rêber Apo ye. Niha ji bo azadiya fîzîkî ya Rêber Apo pêngavek li seranserî cîhanê hatiye destpêkirin, em jî weke wêjevan, rewşenbîr û hemû kesên azadîxwaz tevlî vê pêngavê dibin.
Di dawiyê de hemû kesên beşdar serdana weşanxaneyan kirin û berhemên nû wergirtin.
Hêjayî gotinê ye ku ev pêşangeh di sala 2017’an de ji bo bîranîna şehîd Herekol(Huseyîn Çawşî) hate destpêkirin û îsal di asta beşdarbûnê de ev pêşangeh bûye navnetewî. Ku ji Belcîka, Îtaliya, hemû parçeyên Kurdistanê, Mesr, Libnan û hwd… tevlî vê pêşangehê bûne.
