Ayşa Silêman/Qamişlo
Kongira Star bi dirûşma `Ji Abdullah Ocalan re Azadî, ji Pirsgirêka Kurd re Çareseriya Siyasî ‘ Girêdayî pêngava azadiya fîzîkî ya Rêber Apo li bajarê Qamişlo daxuyaniyek da.
Îro Kongira Star di demjimêr 11’an de li Navenda Çand û Hunerê ya Mihemed Şêxo ya bajarê Qamişlo bi tevlîbûna hemû sazî û rêxistinên di bin sîwana Kongira Star de daxuyaniyek dan.
Di destpêka daxuyaniyê de bal hat kişandin li ser azadiya fîzîkî ya Rêber Apo û
tecrîda girankirî ya li ser wî û wiha hat gotin:”Kampaniyek hatiye destpêkirin. Mirovên çep, sosyalîst, demokrat, azadîxwaz yên xwedî exlaq û wijdan û saziyên demokratîk kampaniyek destpêkirin. Vê kampaniyê di salvegera komploya 9’ê Cotmehê de destpê kir û ev yek jî xwedî wateyek giring e. Bersiva herî mezin û herî bi wate ku li hemberî komploya navneteweyî bê dayîn, teqez meşandina kar û helwesteke bi vî rengî ye. Kampaniyek bi vî rengî destpêkirin pir bi wate û hêja ye, em jî weke rêxistina kongra star tevlî vê kampaniyê dibin û dengê xwe ji qadên şoreşa jin bilind dikin. Ji bo azadiya fizîkî ya Rêber Abdullah Ocalan û her wiha pêwîstiya çaresekirina siyasî ya doza kurdî di herêmê de. Ev 25 sal in ku li zindana Îmraliyê, kiryarên dij mirovahiyê yên di dîrokê de li ser ti girtiyekî nehatine meşandin, li dijî Rêberê Apo tên kirin . Em tecrîda girankirî ya li dijî Rêber Abdullah Ocalan ku desthilatên Tirkiyê ferz kiriye bi tundî şermezar dikin.”
Di berdewamiya daxuyaniyê de hat diyarkirin ku êrîşên dewleta Tirk li ser herêmê berdewamiya tecrîda li ser Rêber Apo ye û wiha hat destnîşan kirin: ” Tecrîd û êrîşên ku dewleta Tirk li dijî Rêber Abdullah Ocalan didomîne, li dijî hemû Kurdan û gel û nasnameyên baweriya xwe bi peradîgma Netewa Demokratîk tînin veguheriye êrîşên qirkirinê. Li Rojava, Bakur û Rojhilatê Sûriyê, Başûrê Kurdistanê, Mexmûr û Şengalê cihên sivîlan tên bombebarankirin. Jin, zarok, kal û tevahî civak tê hedefgiritin. Li pey hev li tevahî cihên binesazî, dibistan, mizgeft Wargeha Mexmûrê ku di bin parastina NY’ê de ye, malên sivîlan hatin bombekirin û jin û zarok hatin qirkirin. Ev êrîşên qirkirinê wê nebe sedem ku Kurd paş ve gav bavêjin. Tirkiyê nahêle ku parêzerên Rêber Apo û malbata wî pêre hevdîtin bikin. Ev hemû binpêkirinên qanûnên mafên mirovan in.”
Herî dawî Kongira Star ji bo azadiya fîzîkî ya Rêber Apo wiha bang kir: “Em weke rêxistina Kongira Star di dawiyê de bang li hemû jinên azadîxwaz Ji siyasetmedar, akademisyen, parlementer, nivîskar, hunermend û rewşenbîr, rêxistin û tevgerên jinan gelek kesên navdar cihê xwe di pêngavê de bigirin û dakevin qadên azadiyê ji bo azadiya fizîkî ya Rêber Abdullah Ocalan tekoşîna zadiyê bilind bikin.”
