MSD’ê dagirkeriya Serêkaniyê û Girê Spî û êrişên dewleta Tirk a dagirker ên li dijî Bakur û Rojhilatê Sûriyeyê şermezar kirin û bang li civata navneteweyî kir ku destwerdanê bike û êrişan rawestîne.
Meclisa Sûriyeya Demokratîk (MSD) di salvegera dagirkirina Serêkaniyê û Girê Spî de, bang li Rûsya û dewletên Koalîsyona Navneteweyî kir ku xwedî li berpirsiyariya xwe derkevin û êrişên li dijî herêmê rawestînin.
MSD`ê di daxuyaniya xwe de berdewamkirina êrişên dagirkeriyê li dijî herêmên Serêkaniyê û Girê Spî, parêzgehên Hesekê û Reqayê di salvegera 4`an a destpêkirina êrişên dagirkirinê ji aliyê dewleta Tirk ve, şermezar kirin.
Her wiha meclisê, êrişên dijminane yên dagirkeriya Tirk çi bi rêya balafirên şer an jî dronan û hedefgirtina binesaziya herêmê û navendên enerjiyê şermezar kir.
Di daxuyaniyê de meclisê diyar kir ku êrişên berdewam bi awayekî trajedîk bandor li jiyana zêdetirî 5 milyon kesî kirin.
Meclisê bang li civata navneteweyî kir ku kiryarên dijminane yên dewleta Tirk şermezar bike, destwerdanê bike, êrişan rawestîne, şênî, binesazî, navendên stratejîk û xizmetguzarî biparêze.
Her wiha meclisê bang li dewletên ereb kir ku li hember sûcên dewleta Tirk a dagirker helwesteke cidî nîşan bidin.
Meclisê bang li Rûsya, Koalîsyona Navneteweyî ya têkoşîna li dijî DAIŞ`ê di serî de DYA û Brîtanya û Fransyê kir ku berpirsyariyên xwe bînin cih û ji bo rawestandina êrişan û parastina herêmê gavên çalaktir biavêjin.
Meclisê sersaxî da malbatên şehîdên Hêzên Ewlekariya Hundirîn, Akademiya Têkoşîna li dijî Hişbirê yên ku ji aliyê Koalîsyona Navneteweyî ve dihatin perwerdekirin. Her wiha ji birîndaran re şîfaya acil xwest.
Meclisê teqezî bi mafê gelê herêmê ku di nav aştî û aramiyê de bijî kir û diyar kir ku çareseriyên aştiyane û giştî bibînin û bang li tevahî aliyên têkildar kir ku hevkar bin û çareseriya siyasî li Sûriyeyê pêk bînin.