Ronaz Silêman/ Qamişlo
Saziyên civaka sivîl û kesayetên serbixwe yên Bakur û Rojhilatê Sûriyê bi daxuyaniyekê êrîşên dagirkeriya Tirk yên li ser binesaziya herêmê şermezar kirin.
Ji bo şermezarkirina êrîşên dewleta Tirk a dagirker, zêdetirî 30 saziyên sivîl û sendîkeyên bakur û rojhilatê Sûriyê, li navenda Lêkolîn û Şêwirên Dîplomatîk a bajarê Qamişlo, ji hemû aliyên navdewletî, sazî, rêxistinên navdewletî û raya giştî re daxuyaniyek dan.
‘Êrîş binesaziya herêmê dike hedefgirtin’
Di daxuyaniyê de hat diyarkirin ku dewleta Tirk bi awayekî eşkere binesaziya herêmê dike armanc û wiha hat gotin: “Rayedarên dewleta Tirk a dagirker di daxuyaniyên xwe yên fermî de nîşan didin ku ew ê çavkaniyên jiyanê ji gelê Bakur û Rojhilatê Sûriyê qut bikin û ev tê wateya îtîrafkirina sûcên şer. Bêdengiya li hember van êrîşan erêkirina berdewamiya karesata mirovî û bêîstiqrariya herêmê ye. Ji ber ku êrîşên bi vî rengî aramiya jiyana xelkê têk dibe, çavkaniyên jiyanî yên sererd û binerd wêran dike, herwiha rê li ber koçkirina kesan û guhertina demografîk ya herêmê, vedike.”
‘Pêwîste netewên yekbûyî bi erkê xweyî êxlaqî rabin’
Di dewamiya daxuyaniyê de wiha hat gotin: “Em bang li sazî û rêxistinên mafên mirovan, Neteweyên Yekbûyî û Konseya Ewlekariyê dikin ku bi erkên xwe yên exlaqî rabin. Herwiha berpirsiyariya qanûnî û çaresekirina pirsgirêkan ji wan tê xwestin.”
Soza berdewamiya berxwedanê hat dayîn
Daxuyaniyî wiha hat qedandinde: “Nûnerên saziyên civaka sivîl ku nûnertiya bi hezaran mirovên li herêmê jiyan dikin; Kurd, Ereb, Suryan, Şîşan, Ermen, Tirkmen, Êzidî, Xiristiyan û Misilman van êrîşên hovane yên dewleta tirk şermezar dikin û soz didin ku wê bi hemû hêza xwe li ber xwe bidin û mil bi mil bi saziyên Rêveberiya Xweser re bin.”
Saziyên ku daxuyanî dan wiha ne:
-Navenda Dîplomasiya Civakî, Tevgera Çand û Hunerê ya Mezopotamyayê, Konferansa Îslama Demokratîk, Yekîtiya Ol û Baweriyan a Mezopotamyayê, Zanîngeha Rojava, Rêveberiya Xwecihî ya Herêma Cizîrê, Tevgera Civaka Demokratîk. TEV – DEM, rêxistinên civaka sivîl li Reqayê, Fedrasyon û rêxistinên civaka sivîl li Tebqayê , Birîndarên şer, Komeleya Civakî ya Efrînê, Komeleya Keziyên Kesk, Mala Êzidiyan, Yekîtiya Bijîşkan, Yekîtiya Dermanfiroşan, Yekîtiya Parêzeran, Yekîtiya Hunermendan, Yekîtiya Karkeran, Yekîtiya Cotkaran, Yekîtiya Mamosteyan, Yekîtiya Rewşenbîran, Yekîtiya Ragihandina Azad.