Mezlûm Keçel diyar kir ku hewldanên wan ji bo rêgirtina li pêşiya qaçaxçîtiya mirovan û qaçaxan didomin. Her wiha aşkera kir ku agahî li ber destê wan hene ku têkilî di navbera qaçaxçiyan û efserên Tirk de heye ji bo ku herêmê ji şêniyên wê vala bikin.
Endamê Rêveberiya Nivîsgeha Têkoşîna li dijî Sûcên Birêxistinkirî ya Hêzên Ewlekariya Hundirîn a Herêma Firatê Mezlûm Keçel, têkildarî qaçaxçîtiya mirovan ku di vê dawiyê de gotegotên li ser wê zêde bûne, axivî.
Mezlûm Keçel got: “Tevahî beşên hêzê, hewl didin rê li pêşiya vê diyardeyê û qaçaxçiyan bigirin. Me gelek ji wan girtin. Dema agahiyek têkildarî qaçaxan bê ber destê me, em pê dikevin û jê piştrast dibin. Dûre bi kemînan çi li ser bendan an jî sînoran, wan digirin. Bi wan re lêpirsînê dikin û wan dişînin Serdozgeriya Giştî.”
‘Hezar û 647 kesên hewl dida sînor derbas bikin hatin girtin’
Keçel têkildarî xebatên wan yên di vî warî de ev agahî parve kirin: “Ji destpêka 2023`yan ve, 208 qaçax hatine girtin û radestî aliyên peywendîdar hatine kirin. Hezar û 674 kes dema hewl didan sînor derbas bikin, hatin girtin.”
‘Piraniya kesên hewl didin derkevin ciwanên in’
Keçel wiha domand: “Herêma Firatê li ser sînorên Tirkiyeyê ye. Qaçax jî, ji gundên ser sînor in. Wek tor e û têkiliyan wan bi hev re hene. Bazirganên wan li bajar û gundan hene. Kesên dixwazin sînor derbas bikin, ji wan re kom dikin, nasnameyên sexte didin wan. Qaçax, ji bo karê xwe hêsan bikin, bi leşker û fermandarên artêşa Tirk re didin û distînin. Armancên dewleta Tirk jî hene ku herêmê vala bike û demografiya wê biguherîne. Piraniya kesên dixwazin derkevin jî ciwan in.”
‘Dewleta tirk sînor li ber ciwanan vedike’
Keçel da zanîn ku gelek metirsiyên vê diyardeyê hene û got: “Kesên bi qaçaxî derbas dibin, rastî lêdan û îşkenceyê ji aliyê leşkerên artêşa Tirk ve tên. Li rex wê, li seranserî sînor, mayîn hene. Ew jî li ser jiyana wan xetere ye. Lê dewleta Tirk ji bo ku ciwan sînor derbas bikin, sînor li pêşiya wan vedike.”
Keçel anî ziman ku armanca qaçaxan pere ye û wiha axivî: “Ji bo vî karî 2 hezar dolar û hin caran zêdetir distînin. Gelek qaçax van pereyan didin efserên Tirk ku koordîne di navbera wan de heye.”
Di dawiyê de Keçel da zanîn ku li gorî agahiyan li ber destê wan û mikurhatinên qaçaxan, nîvê pereyên qaçaxçî distinîn, didin efserên artêşa Tirk a dagirker. ANHA