YPG′ê diyar kir ku Şehîd Aslan bi tecrûbeya xwe ya şoreşgerî û şervantiyê pêşengiya şoreşa Rojava kir û got, em soz didin ku di şexsê heval Aslan de mîrateya şoreşgerî ya şehîdên me ji me re hiştine biparêzin û tola wan hilînin.“
Navenda Ragihandin û Çapemeniyê ya Yekîneyên Parastina Gel (YPG) bi daxuyaniyekê nasnameya şehîdekî xwe aşkera kir.
YPG’ê di daxuyiyaniya xwe de diyar kir ku êrîşên dewleta Tirk a dagirker bi armanca têkbirina aramiya herêmê ye û wiha domand: “Di êrîşên dewleta Tirk a dagirker de pêşengên gel, şêniyên sivîl, şervan û fermandarên hêzên parastinê tên hedefgirtin. Dijminê dagirker di gelek êrîşên xwe de sîxur û xiyanetkaran bi kar tîne. Yek ji êrîşên dewleta Tirk a dagirker di 17’ê Îlonê de pêk hat. Di vê êrîşê de jî şebekeyên sîxuriyê hatin aktîfkirin û pêşengên şoreşê kirin hedef. Di encama vê êrîşa bi balafira keşfê de hevalê me Aslan Qamişlo ku yek ji fermandarên YPG’ê ye şehîd bû.”
YPG’ê da zanîn ku şehîd Aslan bi hestên welatparêzî yên kûr mezin bû û wiha got: “Şehîd Aslan di nava Tevgera Azadiya gelê Kurd de bi hişmendiyeke mezin a îdeolojîk bû xwedî meşeke şoreşgerî ya ku karaktereke gerdûnî bi dest xist, li her qada ku pêwîstiya têkoşînê hebû, bi awayekî aktîf cih girt. Li ser bingeha gelek salan zanîn û ezmûnek mezin bi dest xistiye. Di her qadê de bû hevalek ku bi kedkartî û şerkeriya xwe dihat naskirin.”
YPG’ê da xuyakirin ku şehîd Aslan di sala 2013’an de piştî êrîşên çeteyan ên li ser şoreşa Rojava zêde bûn, hat qada Rojava û wiha dewam kir: “Şehîd Aslan hem di parastin, hem jî di pêşxistina şoreşê de roleke aktîf lîst. Bi tecrûbeya xwe ya şoreşgerî û şervantiyê pêşengiya şoreşa Rojava kir. Bi taybet li dijî êrîşên çeteyên DAIŞ û dewleta Tirk a dagirker ên li ser Rojava, bi civaka Rojava re bûye xwediyê berxwedaneke mezin. Herwiha di xebatên qada civakî de, di her karê ku di pêvajoya avakirina şoreşê de ketibû li ser milê wî de bicîh anî û di perwerdekirin û birêxistinkirina civakê de kedeke mezin da.”
YPG’ê di dawiya daxuyaniya xwe de wiha got: “Em weke hevrêyên têkoşer ji ber şehadeta hevalê xwe Aslan sersaxiyê ji hemû gelê xwe yê welatparêz û di serî de ji malbata wî ya hêja re dixwazin. Em soz didin ku di şexsê heval Aslan de mîrateya şoreşgerî ya şehîdên me ji me re hiştine biparêzin û tola wan hilînin.”