NAVENDA NÛÇEYAN
Dewleta Tirk a dagirker rojane bi armanca dagirkirina xaka Herêma Kurdistanê bi çekên giran û balafirên şer êrişan pêktîne. Piştî wê jî dest bi têkdan û talankirina xwezaya Başûrê Kurdistanê dike.
Di dîmenê ku hatiye parvekirin de talankariya ku dewleta Tirk li ser xwezaya Başûrê Kurdistanê dike, radixe ber çavan.
Li gor zanyariyên ku bi dest ketine, cerdevan û leşkerên Tirk li devera Sindî û Rêkan ya ser bi herêma Behdînan a li parêzgeha Dihokê bi hezaran darên ter dibirin û didizin. Di dîmenan de jî diyar dibe ku cerdevanên girêdayî dewleta Tirk bi dehan traktorên ji daran barkirî ber bi xaka Bakurê Kurdistanê ve dibin.
Li gor agahiyên ji çavkaniyên herêmê bi dest ketine, artêşa Tirk bi hevkariya hin kes û aliyên Başûrê Kurdistanê van daran dibire û derbasî Bakurê Kurdistanê dike.
Ji bilî talankirina daristanên Başûrê Kurdistanê, rojane di encama bombebaranên artêşa Tirk de jî bi sedan donim daristan û baxên welatiyan li Başûrê Kurdistanê dişewitin.
Hêjayî bibîrxistinê ye heta niha ne Hikûmeta Iraqê ne ya Herêmê û nejî ti sazî û rêxistinek jîngehê li beramberî vê talankariya dewleta Tirk a li ser xwezaya Başûrê Kurdistanê helwest nîşan nedane û lêpirsîn nedane destpêkirin.
