Navenda Nûçeyan/ Qmişlo
Hunermendê Kurd yê navdar Beytocan ku demeke dirêj li Swêdê ji ber nexweşiya kanserê dihate dermankirin, jiyana xwe ji dest da.
Malbat û dostên hunermendê kurd yê navdar Beytocan ragihandin ku hunermend Beytocan ê 68 salî vê sibehê li Stockholmê koça dawî kir.
Beytocan demeke dirêj ji ber kanserê dihate dermankirin. Beytocan beriya demekê emeliyateke giran derbas kir, beşeke ji çenga wî hate jêkirin û parçeyek ji lingê wî lê hatibû bicihkirin. Lewma jî bi zehmetî diaxivî.
Beytocan di jiyana xwe ya hunermendiyê de 4 albûm weşand. Albûma wî ya ‘Yan mirin yan Diyarbekir’ li Tirkiyeyê hate qedexekirin. Beriya jiyana xwe ji dest bide, di hevpeyvînekê de diyar dikir ku di nava bêderfetiyê de wî karên xwe yên hunerê kiriye.
Beytocan ku navî wî yê rast Beytullah Gunerî, di 1’ê Cotmeha sala 1955’an li navçeya Farqînê ya Amedê ji dayik bû, di 8 saliya xwe de mala wan hatiye Amedê.
Di dema darbeya leşkerî ya faşîst a 12’ê Îlonê de hate girtin û 15 salan cezayê girtîgehê lê hate birîn. Ew nêzî 6 salan li girtîgehê hate hiştin û sala 1987’an hate berdan.
Beytocan sala 1990’î kaseta xwe ya destpêkê ya muzîkê derxist, piştî salekê jî di sala 1991’ê de neçar ma koçî Swêdê bike.
Beytocan piştî 23 salan cara yekem sala 2014an çûbû Amedê û konser dabû. Hunermendê Kurd Beytocan bi hesreta welêt li xerîbiyê koça dawî kir.
Ji stranên wê yên herî zêde ku di nava gelê Kurd e hatiye guhdarkirin û hezkirin, her; Agir Ketiye Dilê Min, Ji Te Dûrim, Zenga Zenga Dilê Min, Her Tişt Vire, Lo Dilo, Gula Zer, Diyarbekir Mala Min û bi 10’an Stranên din. Hêjayî gotinê ye ku stranên Beytocan ji aliyê gelek hunermendên kurd ve hatine gotin.