Hemza Sêvo/Qamişlo
Piştî 12 salan ji kirîza Sûriyê, welatiyên parêzgeha Siwêdayê careke din rabûn ser piyan û li dijî hikumeta şamê xwepêşandanên berfireh li dar xistin. Derbarê xwepêşandanan de nûnera Partiya Nûjeniya Demokratîk Heyfa Mehmûd bang li gelên Siwêdayê kir ku nehêlin tu hêzên derve derstwerdana xwepêşandanan bike.
Kirîza Sûriyê 12 sal li pey xwe hiştin. Hikumeta Şamê, Rûsya, Îran, dagirkeriya Tirkî û çeteyên girêdayê wê yên navê oposizyonê li xwe dikin, bi ti awayî nikarîbûn çareseriyeke bingehîn ji vê kirîzê bibînin . Lê berovajî vê yekê xwesteka wan domdariya kirîzê bû. Piştî demeke dirêj ji siyaseta ku hikumeta Şamê li ser gelên Sûriyê dimeşîne, gel careke din rabû ser piyan. Herî dawiyê di 20 Tebaxê de welatiyan parêzgeha Siwêdayê careke din rabûn ser piyan û banga guhertina sîstema desthilatdar kirin. Tişta ku herî zêde bala mirov dikşîne, silogan û bankartên ku ji aliyê xwepêşandanan ve tên bilindikirin. Mînaka wê jî bilindkirina silogana ‘Berxwedan Jiyan e’, ‘Xwîna Şehîd Hevrîn Xelef li Siwêdayê kulîlik dide’ û ‘Têk biçe hikumeta serdest’.
Têkildarî xwepêşandanên gel Siweydayê, nûnera Partiya Nûjeniya Dîmokratîk li Sûriyê, Heyfa Mehmûd ji rojnameya me re axivî.
‘Divê gel destûrê nede hêzên derve ku destwerdana xwepêşandanan bike’
Heyfa Mehmûd diyar kir ku divê gelên Sûriyê xwepêşandanan ji mudaxeleya hêzên derve biparêzin û wiha got: “Gelên Sûriyê ji destpêkirina kirîzê ve rastî binpêkirinên zor hatine. Lewra îro gelên Sûriyê jî dixwazin vê hikumeta ku nikare bibe bersiv ji pirsgirêkên gel re, hilweşîne. Em tev dizanin ku rola gelê Siwêdayê di xwepêşandanên 2011’an de yên li dijî hikumetê çiqasî bibandor bûn. Wan li kêleka gelên herêmên din li dijî rêjîmê şoreşek dan destpêkirin. Lê ji ber ku ev şoreş ji destê gel derket û kete destê hêzên çeteyên girêdayî dagirkeran de , herwiha kete destê hêzên derve de, bi ser neket. Vaye dîsa gelê Siwêda dest bi şoreşa xwe ya 2’yem kirin. Ji bo ku careke din şoreşa wan têk neçe divê bi vîna xwe li dijî hikumeta Şamê derkevin. Herwiha nehêlin berjewndiyên derve û hêzên biyanî di vê şoreşê de mudaxeleyê bikin. ”
‘Em destekê didin xwepêşandanên Siwêdayê’
Nûnenera Partiya Nûjeniyê Heyfa Mehmûd da zanîn ku ew piştgiriya xwepêşandanên Siwêdayê dikin û axaftina xwe wiha bi dawî kir: “Em weke partiyên siyasî yên bakur û rojhilatê Sûriyê xwepêşandanên ku li Siwêdayê çêdibin, dişopînin. Xwesteka gelên Siwêda jiyaneke bi rumet û azad e, herwiha têkbirina hikumeta Şamê ya desthilatdar e. Hikumeta Şamê îro dixwaze rewşa Sûriyê vegere weke berî sala 2011’an, lewra tişta ku ji gelên Sûriyê tê xwestin, piştgirya van xwepêşandan ye. Rengê jiyana Netewa Demukratîk ya gelên di bin sîwana Rêveberiya Xweser de dijîn, îro bala wan kesên ku derketine xwepêşandanan, kişandiye. Ew dixwazin ev sîstem li cem wan jî pêk were. Em weke Partiya Nûjeniya Demokratîk piştigriyê didin vê şoreşê. Li nik vê jî em dibêjin rengê jiyana ku li bakur û rojhilatê Sûriyê heyî, ji bo hemû gelên Sûriyê şêweyê jiyana azad û demukrat e.”