Şandeyeke kanadayî serdana Bakur û Rojhilatê Sûriyeyê kir û hevdîtin li herêmê pêk anîn. Şandeyê destnîşan kir ku divê civata navneteweyî piştgirî û desteka Rêveberiya Xweser bike.
Şandeya Kanadayê, ji sentora Parlamentoya Kanadayê Kîm Butt, profesorê alîkar ê hiqûqê yê Zanîngeha Otawa û Zanîngeha Dalhousie Alex Neff, balyozê berê yê Kanada yê ji bo Baltîk Scott Hethrengton û endamê Komeleya Hiqûqî ya Ontario Hedit Nizami pêk hat.
Şande, ji aliyê cîgirên hevseroketiya Daîreya Têkiliyên Derve Fener El Giêt, Robêl Beho û endamên Desteya Rêveber Xalid Îbrahîm û Gulistan Elî ve li navenda daîreyê hate pêşwazîkirin.
Fener El Giêt destnîşan kir ku çareseriya yekane, diyaloga sûriyeyî-sûriyeyî ye û bang li civata navneteweyî kir ku destekê bidin xebatên çareserkirina kirîza Sûriyeyê li gor biryara 2254.
El Giêt der barê darizandina çeteyên DAIŞ’ê de bang li hikumeta Kanadayê û civata navneteweyî kir ku destekê bidin Rêveberiya Xweser û dadgeheke adil ji bo wan çeteyan ava bikin nexasim ku ew bûne bombeyeke demkî û li herêmê û cîhanê metirsî ne.
Kim Butt wiha axivî: “Ez di wê baweriyê de me ku divê civata navneteweyî piştgiriyê bide vê rêveberiyê ku bi tevahî hêza xwe dixebite ji bo ku edaletê, wekheviyê û mirovahiyê dabîn bike. Hewldanên wê yên mirovî li ber çav in ku divê civata navneteweyî û Kanada ji ber wê, hewldanên xwe zêde bikin.”
Dalhousie Alex Neff got:”Ji bo çareserkirina van zehmetiyên mezin û naskirina fedakariyên bêhempa yên ku gelê Bakur û Rojhilatê Sûriyeyê di şerê li dijî DAIŞ`ê de kirine, Em bi awayekî cidî bi rola ku divê Kanada wek endameke civata navneteweyî bilîze û divê civata navneteweyî û Kanada pêkêş bikin, difikirin.”
Neff wiha domand: “3 aliyên bingehîn hene ku em bawer dikin hikumeta Kanadayê dikare pêk bîne û divê roleke mezintir tê de bilîze. Ew jî ev in; pêwistiya me bi hewldaneke cidî ji bo vegerandina kanadayiyan û hemwelatiyên biyanî yên din. Herî zêde ji bo me kanadayiyên li kamp û navendên girtinê, girîng in. Divê Kanada rolek di vegerandina wan de bilîze.”
Neff wiha lê zêde kir:”Ji demeke dirêj de em bangên Rêveberiya Xweser a ji bo avakirina dadgeheke navneteweyî ji bo darizandina çeteyan dibihîsin, lê mixabin civata navneteweyî van bangewaziyan paşguh dike. Ji ber wê jî vegerandin û darizandina xwecih û ya navneteweyî çareseriya dadmendî ya herî rast e. Em ê hewl bidin ku Kanada roleke navendî di vî warî de bilîze.”
