Fermandariya YRK’ê bi daxuyaniyekê ragihand ku êrişên artêşa Tirk a dagirker ên bi rêya balafirên bê mirov ên ser herêmên Asos û Pêncwên dijwartir bûne û got; “Tenê helwesta gelê me dikare dagirkeran bişkîne û rawestîne.”
Fermandariya Yekîneyên Rojhilatê Kurdistanê (YRK) derbarê êrişên dewleta Tirk a dagirker yên li ser herêma Asos û Pêncwênê de daxuyaniyek weşand.
Fermandariyê di daxuyaniyê de diyar kir ku êrişên dewleta Tirk a dagirker ên bi balafirên bê mirov ên li ser herêmên Asos û Pêncwênê dijwartir bûne. Di daxuyaniyê de hate gotin ku ji ber êrişan ziyanek mezin digihê bax û baxçeyên xelkê herêmê.
Fermandariya YRK’ê di dewama daxuyaniya xwe de bang li hemû kesan kir ku dijî êrişan nerazîbûna xwe bidin nîşandan û hate gotin; “Ji ber ku wê tenê helwest û dijberiya gelê me, taybet jî Herêma Kurdistanê, dikare dagirkeriyê bişkîne û rawestîne. Em van êrişên dewleta Tirk a bi tundî şermezar dikin. Armanca êrişên dewleta Tirk, dewamkirina şerê berfireh ê li dijî hemû gelê Kurd e.”
YRK’ê di dawiyê de jî ragihand ku wê teqez têkoşîna gel û hêzên tevgera azadîxwaz ya gelê Kurd, dijî dagirkeriyê biserkeve.