Navenda Nûçeyan/Qamişlo
Yekîtiya Ragehandina Azada û Yekîtiya Ragehandina Jin êrişa li dijî kedkarên Jin TV şermezar kirin û gotin: “Em ji sazî û dezgehên mafê mirovan di serî de yên ji parastina rojnamevanan berpirsyar in daxwaz dikin ku erka xwe ya wijdanî pêk bînin û li hember hedefgirtina dewleta Tirk ji rojnamevan û sivîlên herêmê re bêdeng nemînin.”
Balafireke bêmirov û biçek a dewleta tirk ya dagirker dûh piştî danê nîvro li nêzî xaçrêya gundê Til Şiîr ê li ser rêya Qamişlo-Amûdê, li erebeyeke rojnamevanan da. Di encamê de karmendekî Jin TV’yê yê bi navê Necmedîn Feysel jiyana xwe ji dest dabû û nûçegihanek birîndar bû.
Yekîtiya Ragihandina Jinan bi daxuyaniyekê êrişa li dijî kedkarên JIN TV şermezar kir û got: “Ev êriş, ji bo têkbirina destkeftiyên jinan û herêmê ye ku bi saya fedakariyên şehîdan hatine bidestxistin. Em careke din soz didin tevahî rojnamevanên di oxira eşkerekirina rastiyê de canê xwe feda kirine ku rêya wan berdewam bikin ta ku armancên wan pêk tên û tevahî sûcên dewleta tirk a dagirker ên li dijî gelên eşkere bikin emê têkoşîna xwe bi domînin.”
Yekîtiya Ragehandina Jinan daxuyaniya xwe wiha qedandin: “Em bang li dezgehên çapemeniyê dikin ku sûc û komkujiyên ku dewleta tirk a dagirker pêk tîne ji cîhanê re ragihînin heta ku hesab jê were pirsîn.”
‘Dewleta Tirk a dagirker pir zêde ji kamîre û pênûsên ragihandina azad ditirse’
Herwiha Yekitiya Ragihandina Azad têkildarî êrişê daxuyaniya da û tê de wiha got: “Xebatkarên Ragihandinê ji destpêka şoreşê û heta niha ji bo eşkerekirina plan û siyasetên dewleta Tirk a dagirker û aliyên din ên dijber bê navber di nava liv û tevgerê de ne. Ji ber wê jî dewleta Tirk pir zêde ji kamîre û pênûsên ragihandina azad ditirse. Lewar êrişî xebatkarên ragihandinê dike. 23’yê Tebaxa 2023’an jî li ser riya Qamişlo û Amûdê erebeyeke Jin Tv ku bi armanca amadekirina nûçeyan ji navenda xwe re derketibû, ji aliyê balafireke bê mirov a dewleta Tirk ve hate bombebarankirin. Di encamê de ajokarê erebeyê şehîd bû û nûçegihana JIN TV birîndar bû. Dewleta Tirk bi van kirin û sûcên xwe hemû peyman û yasayên navneteweyî yên Mafê Mirovan li ber çavên hemû cîhanê binpê dikin. Mixabin Koalîsyona Navneteweyî, Rûsiya, Neteweyên Yekbûyî û hemû sazî û dezgehên mafê mirovan û di serî de Yekitiya Rojamevanan a Navneteweyî, Rêxistina Nûçeghanên Sînornenas bi bê dengî li van kirinan temaşe dikin.
Yekitiya Ragihandina Azad daxuyaniya xwe wiha qedand: “Em ji sazî û dezgehên mafê mirovan û di serî de yên ji parastina rojnamevanan berpirsyar in daxwaz dikin ku erka xwe ya wijdanî pêk bînin û li hember hedefgirtina dewleta Tirk ji rojnamevan û sivîlên herêmê re bê deng nemînin.”
Bi heman Armancê Yekîtiya Ragehandina Azad li ber Navenda Neteweyên Yekbûyî ya bajarê Qamişlo bi daxuyaniyekê êrşîa li dijî kedkarên JIN TV şermezar kir û bang rêxistinên navneteyî yên mafê mirovan kir ku li hemberî êrîşên dagirkeriya Tirk yên li dijî rojnemevanan û sivîlan bêdeng nemînin.”