Şêniyên kantona Qamişlo bi xebateke komînal kehrebe peyda kir û bang li şêniyên hemû gundan kir ku xwe bispêrin xwe û mîna wan bikin.
Li 2 gundên navçeya Tirbespiyê şêniyan gelek xebat bi awayekî xweser û komînal pêk anîn. Şêniyên gundê Dugurê yê rojavayê navçeya Tirbespiyê û gundê Xirbet El Dîb ê başûrê rojavayê navçeyê, bi xebateke komînal 2 jenerator kirîn û li gor pergala ampîran kehrebe li malên gund belavkirin.
Ev her du gund li ser girîngiya birêxistinkirinê û çawa ev rêxistinbûyîn dikare zehmetiyan derbas bike mînak in.
Hevserokê komîna gundê Xirbet El Dîb Xelîl Miho got:”Hevkariya di navbera şêniyên gund de nîşan dide ku ew bi xaka xwe ve girêdayî ne û ji bo pêşxistina rewşa gundê xwe, xwe berpirs dibînin.”
Civîna komînê û danîna çareseriyê
Miho destnîşan kir ku wan li komîna gund civînek li dar xist û di civînê de rewşa kehrebeyê û çareseriya pirsgirêka qutbûna kehrebeyê nîqaş kirin û wek encam beşdaran li hev kir ku buhayê jeneratorekê di nav hev de kom bikin û wê bikirin.
Miho wiha domand: “Di encamê de êdî kehrebe li gund li gor pêwîstiya şêniyan peyda dibe. Bi vê xebata xwe me rê li pêşiya keysbazan girt ku buhayê ampîrê keysbaz bikin.”
Li gor Miho, komîteyek ku ji endamên komîna gund pêk tên, çavdêriya xebitandina jeneratorê dike.
Komîn bingeha çareseriyê û banga xwespartinê ye
Hevserokê komîna gundê Dugurê Mihemed Seîd destnîşan kir ku komîn, bingeha çareseriya pirsgirêkan e ku li gundê wan bi rêya komînê şêniyan gelek xebat ji bo gund pêşkêş kirin wek avakirina navendeke sersaxiyê, paqijkirina çemê gund û li vê dawiyê jeneratorek kirîn.
Seîd bang li şêniyên gundên derdorê kir ku di pêşxistina rewşa gundên xwe de xwe, bispêrin xwe û li gor sîstema komîn û Rêveberiya Xweser tev bigerin.
Mihemed Seîd da zanîn ku komîteyên xizmetguzariyê û sotemeniyê yên navçeya Tirbespiyê piştgiriya projeyên wan kirin û ji wan re sotemenî peyda kirin.
