QSD’ê, cezayên DYA’yê yên li komên çete erênî nirxandin û banga bidawîkirina dagirkeriya Tirk a li herêmê û hesabpirsîna ji sûcdaran kir.
Daxuyaniya Navenda Ragihandinê yê Hêzên Sûriya Demokratîk (QSD) wiha ye:
‘Em biryara DYA’yê ya birîna cezayan li komên terorîst ên Hemzaet û Emşat û şîfên wan erênî dibînin. Em di wê baweriyê de ne ku saziyên Amerîkayê dikarin awayên şopandin û cezakirina van koman pêş bixe.
Rapora dawîn a Wezareta Xezîneyê ya Amerîkayê careke din asta kiryarên hovane eşkere dike ku rêxistinên terorîst ên girêdayî dewleta Tirk a dagirker li herêmên dagirkirî yên bakurê Sûriyeyê, bi taybet li Efrîna dagirkirî pêk tînin.
Kiryarên terorî ku li dijî niştecihên resen têne kirine ne kiryarên ferdî ne, lê belê kiryarên sîstematîk û stratejîk in ku bi fermanên dewleta Tirk a dagirker têne kirin. Aliyê sereke yê ku destê wê di van kiriyaran de heye, Tirkiyeyê ye. Tirkiye ev herêm dagir kirine û kirine cihekî ewle ji rêxistinên terorîst ên sûcdar re ku DAIŞ’ê jî di nav de ye. Dewleta Tirk a dagirker bi tevahî rê û rêbazan desekê dide van koman da ku planên guhertina demgorafîk, koçberiya bi darê zorê, revandin, destdirêjî, talankirin û wêrankirinê pêk bînin. Dewleta Tirk a dagirker hewl dide hawirdoreke qanûnî ya navneteweyî peyda bike da ku wan kiryarên terorî binixumîne.
Em bang li tevahî rêxistinên navneteweyî yên têkildar dikin ku dagirkeriya Tirk bi dawî bike û hesab ji sûcdaran bipirse.”
