Endama Koordînasyona Kongra Star sûcên tecawîzkirina jin û zarokan ji aliyê artêşa Tirk a dagirker û çeteyên wê ve li deverên dagirkirî şermez-ar kirin û destnîşan kir ku wan ew sûc belge kirine û şandine rêxistinên navneteweyî û yên jinan; lê belê ew rêxistin bêdeng in.
Der barê sûcên dewleta Tirk a dagirker û çeteyên wê yên li dijî şênî û jinên deverên dagirkirî de, nexasim vê dawiyê ku endamê “meclisa xwecih” a navçeya Cindirêsê Zekeriya Bustanî û kurê wî Nesir Bustanî zarokeke keçîn revand û tecawîz lê kir, endama Koordînasyona Kongra Star Elîf Mihemed ji me re axivî.
Di çarçoveya van rêzesûcan de, berpirsên Tirk û serçeteyên wan tecawîz li 3 mamosteyên dibistaneke Cerablusa dagirkirî kir. Her wiha serçeteyekî “Ceyş El Şerqiye” gefa tecawîzkirinê li keçên welatiyekî navçeya Cindirêsê xwar heke pere nede wan.
Elîf Mihemed destnîşan kir ku hejmara sûcên li herêmên dagirkirî tên kirin, ji yên ragihandî pirtir e.
Elîf diyar kir ku di Tîrmeh û Tebaxê de çeteyên dewleta Tirk a dagirker tecawîz li zêdetirî 20 jin û 5 zarokên keçîn kirine.
Elîf wiha domand: “Dewleta Tirk a dagirker û çeteyên wê Efrîn veguhastiye qada pêkanîna sûcan û navenda çêkirin û belavkirina nakrotîkê.”
Elîf diyar kir ku rêxistinên navneteweyî û yên jinan li hember kiryarên dewleta Tirk a dagirker û çeteyên wê yên li dijî jinên Efrînê bêdeng in û got: “Me gelek sûc belge kirin û bi rêya Rêxistina Mafên Mirovan Efrîn – Sûriye ji bo wan şandin, lê belê dîsa jî bêdeng man.”
Elîf di dawiyê de banga destwerdaneke lezgîn kir ji bo ku sûcên dewleta Tirk a dagirker û çeteyên wê li dijî jinên Efrînê û hemû deverên dagirkirî bên rawestandin. ANHA
