Birûc Resûl/Qamişlo
Rêxistin û tevgerên jinan ên Bakur û Rojhilatê Sûriyeyê ji bo piştgiriya jinên Şengal û Efganistanê kampanyayek da destpêkirin.
Rêxistin û saziyên jinan ên Bakur û Rojhilatê Sûriyeyê bi armanca piştgiriya kampanyaya KJK’ê ya ji bo jinên Şengal û Efganistanê ku dê 3-15’ê Tebaxê bê destpêkirin, li pêşiya Navenda Çand û Hunerê ya Mihemed Şêxo ya bajarê Qamişloyê daxuyanî da.
Di daxuyaniyê de bal hat kişandin ser fermana 3’yê Tebaxa 2014’an a li Şengalê û hate gotin: ”9 sal di ser qirkirina Şengalê re derbas dibe. Komkujiya ku bi êrişa DAIŞ’ê li ser gelê Şengalê di 3’yê Tebaxa 2014’an de pêk hat, bi hovîti û barbariyeke mezin li dijî gelê Êzidî hate kirin. Li pêşiya çavê tevahî cîhanê jin, zarok, pîr, kal bi hezaran kes hatin qetilkirin, bi deh hezaran hatin koçberkirin û ji cih û warê xwe hatin derxistin, bi hezaran jin û zarok hatin revandin û li sûkên koledaran hatin firotin. Zarok bi qirkirineke çandî, nasname û ola xwe re rû bi rû man û di nava çeteyên DAIŞ’ê de di şerê çetecîtiyê û terorê de hatin bikaranîn. Di sedsala 21’ê de li pêşiya çavê tevahî cîhanê hemû kiryarên dermirovî ji kuştin tecawiz û tûndî rastî hemû rengên siyasetê qirkirinê hatin kirin . Bi hezaran jinên ku hatine revandin hîn wenda ne.”
Di dewama daxuyaniyê derbarê rewşa jinên Afganîstanê wiha hate nirxandin: “Heman siyaseta qirkirin û hovitî li dijî jinên Efganîstanê di Tebaxa 2021’an de bi riya Talîbanê ku piştî vekişandina Emerikayê ji Efganîstanê hate kirin. Plana teslîmkirina jinên Efganîstan ji terora Talîbanê re û teslîkirina jinên Şengalê ji DAIŞ’ê re siyaseta qirkirina sîstematîk ku bi pîlanên qirêj ji hêzên hegemon li ser jinê tê meşandin û dixwazin vîna jina azad bi kirasê tarî bipêçin û jinê vegerînin serdema koledariyê.”
Di daxuyaniyê de hate gotin ku ew kampanyaya xwe ji bo jinên Şengal û Efganîstanê dane destpêkirin û wiha hate gotin: “Bi dirûşma “Em li dijî qirkirina jinan jiyanê diafrînin”, bi navê rêxistin û tevgerên Jin li Rojavayê Kurdistan û Bakur û Rojhilatê Sûriyê şehîdên berxwedana Şengal û Efganîstanê bi bîr tînin. Jinên Şengal û Efganîstanê hêviya xwe di şoreşa jin ya Rojavayê Kurdistan û Bakur û Rojhilatê Sûriyê de dibînin, em ê bi hemû hêza xwe bibin bersiv ji hêvî û daxwazên wan re. Di çerçoveya pişgiriya kampanya ku Komeleyên Jinên Kurdistanê (KJK) di navbera 3-15’ê Tebaxê de destpê dike bi rêzeçalakî û xebatên pişgiriyê li beramberî hemû siyasetên qirkirin û dijîtiya ku bi jinan re di sedsala 21’an de tê kirin. Wê jin bi berxwedanî û têkoşînê dîroka xwe bi tîpa zêrîn binivîsîne û hemû pîlanên qirkirinê ku li ser jinê tên kirine, vala derbixîne.”
Li gorî daxuyaniyê bernameya çalakiyan wiha ye:
-Li ser asta Bakur û Rojhilatê Sûriyeyê wê çalakî bên lidarxistin.
-Di 2’yê Tebaxê dê li tevahî qadên jinan mûm werin pêxistin.
-Di 7’ê Tebaxê de wê bi navê rêxistin û tevgerên jinan ên Bakur û Rojhilatê Sûriyeyê forumeke were lidarxistin.
-Di10’ê Tebaxê de wê çalakiyieke protesoyê werin lidarxistin.
-Li parkên giştî wê sînevîzyon li ser Şengalê werin pêşandan.